१०० मीटर परिसरात लक्ष्मणरेषा; पोलिंग बूथ दोनशे मीटर बाहेर
म. टा. प्रतिनिधी, नगर
लोकसभा निवडणुकीच्या मतदानाच्या दिवशी मोबाइल मतदान केंद्रात नेता येणार नाही. मतदान केंद्र परिसराच्या शंभर मीटर परिसरात मोबाइल, कॉर्डलेस फोन, वायरलेस सेट वापरता येणार नाही. तसेच राजकीय पक्ष व उमेदवारांना मतदान केंद्रापासून दोनशे मीटर दूर पोलिंग बूथ असणार आहे. निवडणूक आयोगाच्या आदेशांची अंमलबजावणी निवडणूक यंत्रणेकडून करण्यात येणार आहे. राजकीय पक्ष आणि उमेदवारांनीही या निर्णयाची अंमबजावणी करावी, असे आवाहन करण्यात आले आहे.
नगर जिल्ह्यात नगर व शिर्डी असे दोन मतदारसंघ आहेत. नगर मतदारसंघात येत्या २३ एप्रिल रोजी मतदान होणार आहे. तर शिर्डी मतदारसंघात २९ एप्रिल रोजी मतदान होणार आहे. या मतदानाच्या दिवशी राजकीय पक्ष आणि उमेदवारांना मतदान केंद्रापासून २०० मीटर दूर पोलिंग बूथ लावावा लागणार आहे. याशिवाय, याठिकाणी त्यांना केवळ एक टेबल आणि दोन खूर्ची ठेवता येणार आहेत. सावलीसाठी छत्रीचा आधार घ्यावा लागेल. या परिसरात तंबू उभारण्यास निवडणूक आयोगाने मनाई केली आहे. मतदान केंद्र परिसराच्या १०० मीटर परिसरात मोबाइल, कॉर्डलेस फोन, वायरलेस सेट वापरण्यास प्रतिबंध असणार आहे. केवळ अधिकृतरित्या निवडणूक कामांसाठी नियुक्त अधिकारी आणि पोलीस यांनाच सवलत राहणार आहे.
--
..तर बॅनरवर कारवाई
मतदानाच्या दिवशी मतदारांना त्यांचा मतदार क्रमांक शोधणे सोपे व्हावे, यासाठी निवडणूक यंत्रणेप्रमाणेच राजकीय पक्ष आणि उमेदवारांकडून पोलिंग बूथ लावले जातात. त्याठिकाणी उमेदवाराचे नाव, पक्ष आणि उमेदवारास निवडणूक आयोगाकडून मिळालेले चिन्हाचे केवळ एकच बॅनर लावता येईल. या बॅनरचा आकारही आयोगाने निश्चित केला आहे. यापेक्षा जास्त आकाराचे बॅनर आढळल्यास बॅनर काढून टाकण्यात येतील, अशा सूचना दिल्या आहेत. बूथवर विनाकारण गर्दी करता येणार नाही, मतदानानंतर तेथे थांबता येणार नाही. पोलींग बुथमुळे मतदान प्रक्रियेला कोणतीही अडचण निर्माण होणार नाही, याची काळजी संबंधित पक्ष आणि उमेदवारांना घ्यावी लागणार आहे.