दोन मुलींच्या नावे मनपाची ‘ठेव’

म. टा. प्रतिनिधी, नगर
महापालिकेच्या यंदाच्या अर्थसंकल्पात शिवसेनेच्या महापौर सुरेखा कदम यांनी समाविष्ट केलेली अभिनव योजना बुधवारी प्रत्यक्षात आली. मनपाच्या बाळासाहेब देशपांडे रुग्णालयात जन्म घेतलेल्या दोन मुलींच्या नावे मनपाने प्रत्येकी २१०० रुपयांची ठेव पावती केली. ‘स्त्री जन्माचे स्वागत करा’ उपक्रमांतर्गत राज्यातील महापालिकांमध्ये नगर मनपाने राबविलेला हा पहिलाच आगळावेगळा उपक्रम ठरला आहे.
यंदाचा मनपाचा अर्थसंकल्प मांडताना महापौर कदम यांनी स्त्री भ्रुण हत्या रोखण्यासाठी तसेच स्त्री जन्माचे स्वागत करण्यासाठी देशपांडे रुग्णालयात जन्म घेणाऱ्या मुलींच्या नावे २१०० रुपयांची ठेव पावती महापालिकेद्वारे करण्याचे घोषित केले होते. या योजनेचे सर्व कार्यालयीन सोपस्कार मागील दोन-तीन महिन्यात करण्यात आले व बुधवारी प्रत्यक्ष या योजनेची सुरुवात झाली. देशपांडे रुग्णालयात झालेल्या या कार्यक्रमात आदिती या मुलीच्या नावे केलेली ठेव पावती तिची आई दीपाली भागवत (केडगाव) यांना तर आवनी या मुलीच्या नावे केलेली अशी ठेव पावती तिची आई आरती दुडगू (पाइपलाइन रोड, सावेडी) यांना सेनेचे उपनेते अनिल राठोड यांच्या हस्ते सुपूर्द करण्यात आली. यावेळी महापौर कदम, विरोधी पक्ष नेते बाळासाहेब बोराटे, अतिरिक्त आयुक्त विलास वालगुडे, महिला व बालकल्याण समितीच्या सभापती सारिका भुतकर, नगरसेविका आशा बडे, मंगला गुंदेचा, सुनीता भिंगारदिवे तसेच नगरसेवक मुदस्सर शेख, सेनेचे माजी शहर प्रमुख संभाजी कदम, किसन भिंगारदिवे, आरोग्याधिकारी डॉ. अनिल बोरगे, परिचारिका राधिका कुलकर्णी, नलिनी थोरात व अन्य उपस्थित होते.
या वेळी बोलताना महापौर कदम यांनी स्त्री जन्म स्वागत ठेव पावतीची संकल्पपूर्ती आनंददायी असल्याचे आवर्जून सांगितले. स्त्री जन्म स्वागतासाठी शासनाद्वारे विविध योजना राबविल्या जात असताना नगर महापालिकेनेही त्यात घेतलेला सहभाग महत्त्वाचा आहे. गरीब मुलींना यातून भविष्यात चांगला आर्थिक लाभ मिळेल, असा विश्वास त्यांनी व्यक्त केला.