म. टा. प्रतिनिधी, नगर
'तोच चंद्रमा नभात'.. 'हे सुरांनो चंद्र व्हा'.. 'उगवला चंद्र पुनवेचा'.. 'चंद्रिका ही जणू'...'हसले मनी चांदणे'...अशा अनेकविध चंद्र गाण्यांनी नगरकर संगीत रसिकांना मंत्रमुग्ध केले. कोजागरीनिमित्त येथील बंदिश सांगीतिक कला प्रतिष्ठानच्या पुढाकाराने सावेडी ज्येष्ठ नागरिक मंचाच्या सभागृहात झालेल्या 'चंद्र आहे साक्षीला' मैफलीत ही चंद्रगाणी रंगली.
नगरकर संगीत रसिकांसाठी या मैफलीचे आयोजन करण्यात आले होते. ज्येष्ठ संगीत अभ्यासक डॉ. मधुसूदन बोपर्डीकर यांनी हार्मोनियमवर विविध चंद्र गाण्यांचे सादरीकरण केले. 'रजनीनाथ हा नभी उगवला', 'कैवल्याच्या चांदण्याला' या त्यांच्या सुरावटींना टाळ्यांची दाद मिळाली. डॉ. धनश्री खरवंडीकर यांच्या 'चकोर आम्ही हरीचे' भक्तिगीतासही दाद मिळाली. पवन नाईक, मकरंद खरवंडीकर, सुमेधा देशपांडे, जया मिरांडे, सुनीता गुंजाळ, ज्योती काळे, वर्षा पंडित, परशुराम मुळे, प्रकाश कुलकर्णी, कैलास बेरड, लक्ष्मण डहाळे यांनीही सादर केलेली 'मयुर लाजला नृत्य पाहूनी', 'तुने मुझे बुलाया शेरावालीये', 'हे भोळ्या शंकरा', 'बोला हो माझ्याशी', 'सांज ये गोकुळी', 'प्रभू हा खेळ दुनियेचा', 'देवाघरचे ज्ञात कुणाला', 'बाजे मुरलिया बाजे' अशा अनेकविध गाण्यांना रसिकांनी दाद दिली. उपाध्यक्ष अशोक गांधी, विलास जोशी, सुरेश हातवळणे, सर्वोत्तम क्षीरसागर, श्रीकांत नाईक, जगन्नाथ कुलकर्णी, प्रसाद सुवर्णपाठकी आदी या वेळी उपस्थित होते. उमा देशपांडे यांनी सूत्रसंचालन केले.
--