म. टा. प्रतिनिधी, नगर
कोरेगाव-भीमा दंगल प्रकरणी गुन्हा दाखल असलेल्या मनोहर उर्फ संभाजी भिडे गुरूजी यांना अटक करावी, या मागणीसाठी जिल्हाधिकारी कार्यालयासमोर पीपल्स रिपब्लिकन पार्टीच्या वतीने 'जवाब दो'आंदोलन करण्यात आले.
कोरेगाव-भीमा प्रकरणी भिडे गुरूजी यांच्यावर गुन्हा दाखल असून, ते पोलिस संरक्षणात राज्यात फिरत आहेत. अनेक ठिकाणी सभा घेवून युवकांची माथी भडकविण्याचे काम ते करीत आहेत. बहुजन समाजातील युवकांची दिशाभूल केली जात आहे. अंधश्रद्धेला खतापाणी घालण्याचे वक्तव्य त्यांनी केले आहे. तसेच शहरातील अॅड. दांगट मारहाण प्रकरणात देखील त्यांचा हात असल्याचा आरोप करण्यात आला असून, त्यांना तातडीने अटक करण्यात यावी, अशी मागणीही संघटनेच्या वतीने करण्यात आली आहे. या वेळी जिल्हाध्यक्ष सुनील क्षेत्रे, शहर जिल्हाध्यक्ष सुमेध गायकवाड, संपर्क प्रमुख नितीन कसबेकर, महिला जिल्हाध्यक्षा गौतमी भिंगारदिवे, सुनिता धनवटे, नयन खंडारे, विशाल दराडे, कविता भांड, लता बर्डे, कुंदा बर्डे, निर्मला लांडगे, महेश भोसले, किरण गायकवाड, विशाल गायकवाड, अमोल चावक, विजय वडागळे यांच्यासह कार्यकर्ते उपस्थित होते.