‘संचयनी’ची मालमत्ता सील

म. टा. प्रतिनिधी, नगर

मालमत्ता कराच्या तब्बल १२ लाखांच्या थकबाकी वसुलीसाठी महापालिकेच्या पथकाने जुन्या बसस्थानकाजवळील अंबर प्लाझा इमारतीतील संचयनी सेव्हिंग्ज ऑल इन्व्हेस्टमेंट संस्थेची मालमत्ता बुधवारी जप्त करून सील केली. याशिवाय केडगाव येथील नारायण कापरे यांनी त्यांच्याकडील ५६ हजारांची मालमत्ता कर थकबाकी भरली नसल्याने त्यांचे पाण्याचे नळ जोड बंद करण्यात आले.

मनपाचे अतिरिक्त आयुक्त विलास वालगुडे यांच्या नेतृत्वाखाली बुरुडगाव-केडगाव प्रभाग समितीचे अधिकारी नाना गोसावी यांच्यासह कर निरीक्षक बी. एम. आढाव, शाम गोडळकर, वसुली लिपिक गणेश विद्ये, दीपक घेवारे, विजय चौरे, बाबा मतकर व अन्य सदस्यांच्या वसुली पथकाने बुधवारी जोरदार वसुली मोहीम राबवली. जुन्या माळीवाडा बसस्थानकासमोरील अंबर प्लाझा इमारतीतील मालमत्ताधारक बोरा शहा फॅमिली ट्रस्ट भोगवटाधारक संचयनी सेव्हिंग्ज ऑल इन्व्हेस्टमेंट या संस्थेकडील १२ लाख ४५ रुपयांच्या मालमत्ता कर वसुलीसाठी त्यांना नोटिसा देण्यात आल्या होत्या. मात्र, त्यांनी पैशांचा भरणा केला नसल्याने त्यांना जप्तीपूर्व नोटीस बजावण्यात आली होती. त्यानुसार बुधवारी दुपारी दोनच्या सुमारास जप्तीची कारवाई करून ही मालमत्ता सील करण्यात आली.

याशिवाय केडगाव उपकार्यालयाच्या अंतर्गत असलेल्या वॉर्ड ३२ मधील नारायण कापरे यांच्याकडील ५६ हजार ५३६ रुपयांच्या थकित मालमत्ता कर वसुलीसाठी त्यांचे नळजोड बंद करण्यात आल्याचे महापालिकेद्वारे सांगण्यात आले.