नगरमध्ये खुनाचा प्रकार उघडकीस

नगरःनगर-औरंगाबाद महामार्गालगत गुरुवारी सकाळी खोसपुरी (ता. नगर) शिवारात एका अनोळखी व्यक्तीचा मृतदेह सापडला. या व्यक्तीचा गळा आवळून खून करून पुरावा नष्ट करण्याचा प्रयत्न झाला आहे. याप्रकरणी एमआयडीसी पोलिस ठाण्यात अज्ञात आरोपीविरुद्ध गुन्हा नोंदवण्यात आला आहे.

औरंगाबाद महामार्गालगत खोसपुरी शिवारात बानकर यांच्या शेतात ३५ ते ४० वर्षे वयोगटातील पुरुषाचा मृतदेह आढळला. त्याचा गळा आवळून खून करून चेहरा ज्वलनशील पदार्थ टाकून जाळलेला होता. त्याच्या अंगामध्ये गुलाबी रंगाचा शर्ट, काळ्या रंगाची पँट व पॅरागॉन चप्पल असून डाव्या हातावर बदामाच्या आकारामध्ये आर. एम. असे गोंदलेले होते. गुरुवारी सकाळी सहा वाजण्याच्या सुमारास एका हॉटेल चालकाला हा मृतदेह त्याच्या हॉटेल समोरच्या शेतात पडलेला दिसला. याबाबत त्याने पोलिस पाटील अंबादास देवकर यांना माहिती दिली. त्यांनी घटनास्थळी जाऊन पोलिसांना माहिती दिली. त्यानंतर पोलिस अधीक्षक रंजनकुमार शर्मा, अतिरिक्त अधीक्षक घनःश्याम पाटील, घटनास्थळी दाखल झाले. याप्रकरणी पोलिस पाटील देवकर यांनी दिलेल्या फिर्यादीवरून अज्ञात व्यक्तीविरुद्ध गुन्हा नोंदवण्यात आला आहे.