म. टा. प्रतिनिधी, नगर नगरमधील सामान्यांसह व्यापारी-व्यावसायिक विश्वाची आधारस्तंभ मानल्या जाणाऱ्या नगर अर्बन सहकारी मल्टिस्टेट शेड्युल्ड बँकेच्या १०६ व्या स्थापनादिनाचा अध्यक्ष खासदार दिलीप गांधींसह त्यांचे संचालक मंडळ सहकारी तसेच बँकेच्या वरिष्ठ अधिकारी या साऱ्यांनाच विसर पडला. स्थापनादिनीच (रविवारी) बँकेच्या मुख्य कार्यालयाच्या दरवाजावर चक्क कुलूप झळकत होते! सलग तीन दिवसांच्या सुट्ट्यांमुळे बँकेच्या स्थापनादिनाचा कोणताही विशेष कार्यक्रमही झाला नाही. वर्ष प्रतिपदा चैत्र शुद्ध १ शके १८३२ रोजी म्हणजे १० एप्रिल १९१० रोजी नगर अर्बन सोसायटीची स्थापना संस्थापक रावबहादूर चितळे, भाऊसाहेब फिरोदिया, वैद्य गंगाधरशास्त्री गुणे, मोतीलाल फिरोदिया आदींच्या उपस्थितीत झाल्याचे सांगितले जाते. तेव्हाची सोसायटी म्हणजे त्या काळातील बँकच मानली जात होती. पुढे नगर अर्बन बँक म्हणून ही संस्था नावारूपाला आली. प्रगतीचे विविध टप्पे गाठत चार वर्षांपूर्वी मल्टिस्टेट बँकही झाली. नगर शहर व जिल्ह्यातील बहुतांश तालुक्यांसह पुणे व अन्य जिल्ह्यातही या बँकेचा विस्तार झाला आहे. कोट्यवधीची आर्थिक उलाढाल करणाऱ्या या बँकेचा स्थापनादिन दरवर्षी उत्साहात होतो. बँकेच्या मुख्य इमारतीला विद्युत रोषणाई व अन्य विविध उपक्रम दिवसभर होतात. पण या वर्षी स्थापनादिनाकडे सर्वांचेच दुर्लक्ष झाल्याचे दिसून आले. रविवारी (१० एप्रिल) नगर अर्बन बँकेने स्थापनेची १०६ वर्षे पूर्ण केली आहेत. दोन दिवसांपूर्वी झालेल्या वर्ष प्रतिपदेला (गुढीपाडवा) सुटी असल्याने व आजही रविवारची सुटी असल्याने यंदा तिथी व तारीख असे दोन्ही स्थापना दिन सुटीतच गेले आहेत. बँकेचे विद्यमान अध्यक्ष खासदार दिलीप गांधी हे हौशी व समारंभप्रिय मानले जातात. स्थापना दिनाचा उत्सव म्हणजे त्यांच्या दृष्टीने स्नेहमेळाव्याच्या पर्वणीचा ठरला असता. पण त्यांच्यासह त्यांच्या संचालक मंडळातील सदस्यांना तसेच बँकेच्या वरिष्ठ अधिकाऱ्यांनाही चक्क विसर पडला आणि बँकेचा स्थापनादिन चक्क सुनासुना झाल्याचे स्पष्ट झाले. बँकेच्या काही सभासदांनी मात्र याबाबत ‘मटा’शी बोलताना खंत व्यक्त केली. |
‘नगर अर्बन’च्या स्थापनादिनाचा विसर
नगरमधील सामान्यांसह व्यापारी-व्यावसायिक विश्वाची आधारस्तंभ मानल्या जाणाऱ्या नगर अर्बन सहकारी मल्टिस्टेट शेड्युल्ड बँकेच्या १०६ व्या स्थापनादिनाचा अध्यक्ष खासदार दिलीप गांधींसह त्यांचे संचालक मंडळ तसेच बँकेच्या वरिष्ठ अधिकारी या साऱ्यांनाच विसर पडला.
Maharashtra Times 11 Apr 2016, 3:00 am