पालिकेत पथदिव्यांचा ४० लाखांचा गैरव्यवहार

पालिकेत पथदिव्यांचा ४० लाखांचा गैरव्यवहार


म. टा. प्रतिनिधी, नगर
महापालिकेत मागील १५ दिवसांपासून गाजत असलेला बोगस पथदिवे बिले घोटाळा प्रत्यक्षात झालाच असल्याचा निष्कर्ष चौकशी समितीने काढला आहे. या प्रकरणात गंभीर स्वरुपाची अनियमितता व या माध्यमातून पालिकेची आर्थिक फसवणूक झाल्याचे समितीने स्पष्ट केले आहे. त्यामुळे आता या अहवालानुसार आयुक्त घनश्याम मंगळे यांच्याकडून दोषींवर काय कारवाई होते, याची प्रतीक्षा आहे.
स्थायी समिती व महासभेत पथदिवे घोटाळ्याचा प्रकार उघड झाल्यानंतर आयुक्त मंगळे यांनी अतिरिक्त आयुक्त विलास वालगुडे व नगर रचना विभागाचे सहायक संचालक संतोष धोंगडे यांची दोन सदस्यीय चौकशी समिती नेमली होती. या समितीने तपासणी करून व सर्व संबंधितांचे जबाब नोंदवून त्यांचा अहवाल सादर केला आहे. या समितीचे निष्कर्ष आयुक्त मंगळे यांनी आज सायंकाळी पत्रकारांना सांगितले. संबंधित अहवालाचा दोन दिवस अभ्यास करून दोषींवरील कारवाई व पालिकेच्या भविष्यातील कामकाजाबाबतचा कृती आराखडा येत्या सोमवारी (१५ जानेवारी) जाहीर करण्याचे स्पष्ट केले.
……..
चार महत्त्वाचे मुद्दे
चौकशी समितीच्या निष्कर्षात चार महत्त्वाचे मुद्दे मांडले गेले आहेत. संबंधित १ व २८ वॉर्डांतील पथदिव्यांची कामे सुचवली नसल्याचे संबंधित चारही नगरसेवकांचे म्हणणे आहे. त्यामुळे ही कामे नेमकी कोणी सुचवली, याचा बोध होत नाही; तसेच या पथदिव्यांची मूळ फाइल उपलब्ध होत नाही, या कामाशी संबंधित ठेकेदार समितीसमोर जबाब देण्यास आला नाही व हे सर्व प्रकार म्हणजे गंभीर अनियमितता असून, या माध्यमातून पालिकेची आर्थिक फसवणूक व नुकसान झाले असल्याने संबंधितांवर कायद्यानुसार आवश्यक कारवाई गरजेची असल्याचे समितीचे प्रमुख निष्कर्ष आहेत. त्यामुळे मूळ फाइल चोरीस जाणे, तसेच लेखा परीक्षक चंद्रकांत खरात यांची बनावट सही करण्याच्या प्रकरणी दोन गुन्हे दाखल होणे आता अपेक्षित असून, चौकशी समितीचे निष्कर्ष व शिफारशींनुसार पालिकेच्या आर्थिक फसवणुकीबद्दल संबंधितांविरुद्धही स्वतंत्र फौजदारी गुन्हे दाखल होण्याची शक्यता आहे.