सहा पारितोषिकांसह नगरचे 'द ग्रेट एक्सचेंज' राज्यात प्रथम
म. टा. प्रतिनिधी, नगर
महाराष्ट्र्र राज्य मार्ग परिवहन महामंडळाच्या राज्यस्तरीय ४९ व्या नाट्य स्पर्धेत नगर विभागाच्या 'द ग्रेट एक्सचेंज' या नाटकाने विजेतेपद पटकावले. यासह उत्कृष्ट पुरुष कलाकाराचे प्रथम व दिग्दर्शनाचे प्रथम पारितोषिक किशोर पराते, अभिनयाचे उत्तेजनार्थ पारितोषिक राजू घोरपडे व अभय गोले, नेपथ्य प्रथम क्रमांकाचे पारितोषिक नीलेश चांदणे, शोभा चदणे व सचिन घोडके अशी सहा वैयक्तिक पारितोषिकेही या नाटकाने पटकावली. दिग्दर्शन आणि अभिनय रौप्यपदकाचा बहुमान पराते यांच्या रूपाने नगरला मिळाला. नगरचे ज्येष्ठ कलावंत (स्व.) अनिल ऊर्फ बालीकाका क्षीरसागर यांना २६ वर्षांपूर्वी हा मान मिळाला होता.
सातारा येथे झालेल्या अंतिम फेरीत 'द ग्रेट एक्सचेंज' नाटकाचा प्रयोग रंगला. नाट्य कलावंत क्षीतिज झावरे यांनी लिहिलेल्या या नाटकाने सोलापूर येथे झालेल्या प्राथमिक फेरीतही दिग्दर्शन, अभिनय आणि नाटक प्रथम अशी पारितोषिके पटकावली होती. या नाटकाच्या यशात निर्मिती प्रमुख नगरचे विभाग नियंत्रक विजय गिते, निर्मिती सूत्रधार असलेले कामगार अधिकारी सचिन भुजबळ तसेच कामगार कल्याण समितीद्वारे झालेले व्यवस्थापन यांचा मोलाचा वाटा आहे. याशिवाय अभय गोले, गोविंद पीडियार, राजेश घोरपडे, जयदेव हेंद्रे, शोभा नांगरे, स्वरूपा वैद्य, संदीप शिंदे, सुरेश गिते, अरुण वीरकर, बापू शिंदे, जाकीर शेख, काका आवचिते, सचिन घोडके, नीलेश चांदणे आदी कलावंतांसह जालिंदर शिंदे, सागर मेहेत्रे, नाना मोरे, आबा सैंदाणे, मुन्ना सय्यद, सचिन इंदलकर, सुनील वणवे, शैलेश देशमुख, गणेश लिमकर, अशोक अकोलकर, चेतन ढवळे यांचे तांत्रिक सहकार्य होते.
विजेत्या नाट्य संघातील कलावंतांचे अखिल भारतीय मराठी नाट्य परिषदेच्या नगर शाखेचे अध्यक्ष अमोल खोले, मध्यवर्ती शाखेचे सहकार्यवाह सतीश लोटके, नियामक मंडळ सदस्य सतीश शिंगटे, अखिल भारतीय मराठी चित्रपट महामंडळाचे जिल्हा समन्वयक शशिकांत नजान व अभिनेते प्रकाश धोत्रे आदींनी कौतुक केले.
--