म. टा. प्रतिनिधी, नगर
महापालिका मुबलक पाणीपुरवठा करीत नसल्यामुळे नगर-पुणे महामार्गावर कायनेटिक चौकाच्या पुढे असणाऱ्या उड्डाणपुलावर तब्बल दीड तास रास्ता रोको आंदोलन करण्यात आले. मनपाचे अधिकारी येऊन लेखी आश्वासन देत नाहीत, तोपर्यंत रस्त्यावरून हटणार नसल्याची भूमिका आंदोलकांनी घेतली. त्यामुळे नगर-पुणे मार्गावर वाहनांच्या लांबचलांब रांगा लागल्या होत्या. अखेर पोलिसांनी मनपाच्या अधिकाऱ्यांनी घटनास्थळी बोलवल्यानंतर व त्यांनी लेखी आश्वासन दिल्यानंतर हे आंदोलन मागे घेण्यात आले.
केडगाव देवी रोड परिसरातील अमितनगर, ताराबाग कॉलनी व एकता कॉलनी येथील नागरिकांना एक दिवसाआड व पूर्ण दाबाने पाणीपुरवठा करण्यात येत होता. परंतु, येथील जुनी पाण्याची पाइपलाइन बदलण्यात आली असल्याने येथील नागरिकांना नव्याने पाण्याचे जोड घेण्यास सांगण्यात आले होते. नवीन जोड घेतल्यानंतर दिवसाआड व पूर्णदाबाने पाणीपुरवठा करण्याचे तोंडी आश्वासन येथील नागरिकांना दिले होते. प्रत्यक्षात मात्र या भागात नियमित मुबलक पाणीपुरवठा केला जात नसल्याचा आरोप येथील नागरिकांनी केला.
महापालिका आयुक्तांना ३० ऑक्टोबर रोजी निवेदन देऊन मुबलक पाणीपुरवठा न केल्यास रास्ता रोको आंदोलन करण्याचा इशारा नागरिकांनी दिला होता. महापालिकेने याकडे दुर्लक्ष केल्यामुळे अखेर अमितनगर, ताराबाग कॉलनी, एकता कॉलनी भागातील नागरिकांनी गुरुवारी दुपारी बाराच्या सुमारास कायनेटिक चौकाच्या पुढे असणाऱ्या उड्डाणपुलावर येऊन रस्त्यावर ठिय्या मांडत नगर-पुणे महामार्ग रोखला. अवघ्या काही मिनिटांमध्येच या महामार्गावर वाहनांच्या लांबचलांब रांगा लागल्या. पोलिसांनी घटनास्थळी धाव घेऊन रास्ता रोको आंदोलन मागे घेऊन महापालिकेच्या अधिकाऱ्यांसोबत चर्चा करण्याची आंदोलकांना विनंती केली. पण लेखी आश्वासन मिळेपर्यंत रस्त्यावरून उठणार नाही, अशी भूमिका आंदोलकांनी घेतली. सहायक पोलिस अधीक्षक डॉ. अक्षय शिंदे यांनीही रास्ता रोको आंदोलन घेण्याची विनंती केली. परंतु, त्यांनाही आंदोलकांनी प्रतिसाद दिला नाही. अखेर पोलिसांनी महापालिकेच्या अधिकाऱ्यांना आंदोलनाबाबत माहिती देऊन घटनास्थळी बोलावले. त्यानंतर उपायुक्त विक्रम दराडे यांनी पाणीपुरवठा विभागीत कर्मचाऱ्यांसह घटनास्थळी येऊन दिवसाआड मुबलक पाणी देण्याचे आश्वासन दिल्यामुळे हे आंदोलन मागे घेण्यात आले.
रुग्णवाहिकेला वाट देण्यासाठी धावपळ
रास्ता रोको आंदोलन सुरू झाल्यामुळे नगर-पुणे महामार्गावर वाहनांच्या लांबचलांब रांगा लागल्या होत्या. या आंदोलनामध्ये दोन रुग्णवाहिका अडकल्या होत्या. रुग्णवाहिकांना जाण्यासाठी वाट करून देण्याची विनंती पोलिसांनी आंदोलकांना केली. यावरून आंदोलकांमध्ये मतभेद सुरू झाले. अखेर पोलिसांनी रुग्णवाहिकेच्या समोरील सर्व गाड्या एका बाजूला घेऊन व दोन्ही रुग्णवाहिकांच्या मधोमध पोलिसांची गाडी ठेवून त्यांना वाट करून दिली. तर, आंदोलन सुटण्याची चिन्ह दिसत नसल्यामुळे चासवरून नगरच्या दिशेने येत असलेल्या वाहनांनी पुन्हा माघारी फिरून बाह्यवळण रस्त्याने जाणे पसंत केले.
वाहनांच्या गर्दीतून अधिकाऱ्यांनी काढली वाट
नगर-पुणे महामार्गावर वाहनांच्या लांबचलांब रांगा लागल्यामुळे पोलिस अधिकाऱ्यांसह महापालिकेच्या अधिकाऱ्यांना कायनेटिक चौकाजवळ आपली वाहने लावावी लागली. त्यानंतर वाहनांच्या गर्दीतून वाट काढत हे अधिकारी आंदोलनस्थळी पोहचले होते. दरम्यान, मनपाचे अधिकारी आंदोलनस्थळी आल्यानंतर पोलिसांनी रस्ता मोकळा करण्याच्या सूचना आंदोलकांना केली. परंतु, त्याला काही आंदोलकांनी नकार देताच पोलिसांनी यासर्वांना रस्त्याच्या बाजूला काढले. त्यानंतर उड्डाणपुलाच्या शेजारून जाणाऱ्या केडगाव देवी रोडवर आंदोलक व मनपाच्या अधिकाऱ्यांमध्ये चर्चा झाली. त्या ठिकाणी उपायुक्त विक्रम दराडे यांनी लेखी आश्वासन दिल्यानंतर हे आंदोलन मागे घेण्यात आले.
चौकट ः
वाहनचालकांची नाराजी
नगर-पुणे महामार्गावर सुरू झालेले आंदोलन लवकर मिटण्याची चिन्हे दिसत नसल्याने अनेक वाहनचालकांनी नाराजी व्यक्त केली. शाळेला जाणाऱ्या विद्यार्थ्यांसह महत्त्वाच्या कामानिमित्त बाहेर पडलेले अनेक वाहनचालक या आंदोलनामुळे अडकून पडले होते. दुचाकी चालकांना बाजूने वाट काढण्याचा प्रयत्न केला. परंतु, आंदोलकांनी त्यांना पुढे जाऊ दिले नाही. त्यामुळे अनेकांनी नाराजी व्यक्त केली.
महापालिका मुबलक पाणीपुरवठा करीत नसल्यामुळे नगर-पुणे महामार्गावर कायनेटिक चौकाच्या पुढे असणाऱ्या उड्डाणपुलावर तब्बल दीड तास रास्ता रोको आंदोलन करण्यात आले. मनपाचे अधिकारी येऊन लेखी आश्वासन देत नाहीत, तोपर्यंत रस्त्यावरून हटणार नसल्याची भूमिका आंदोलकांनी घेतली. त्यामुळे नगर-पुणे मार्गावर वाहनांच्या लांबचलांब रांगा लागल्या होत्या. अखेर पोलिसांनी मनपाच्या अधिकाऱ्यांनी घटनास्थळी बोलवल्यानंतर व त्यांनी लेखी आश्वासन दिल्यानंतर हे आंदोलन मागे घेण्यात आले.
केडगाव देवी रोड परिसरातील अमितनगर, ताराबाग कॉलनी व एकता कॉलनी येथील नागरिकांना एक दिवसाआड व पूर्ण दाबाने पाणीपुरवठा करण्यात येत होता. परंतु, येथील जुनी पाण्याची पाइपलाइन बदलण्यात आली असल्याने येथील नागरिकांना नव्याने पाण्याचे जोड घेण्यास सांगण्यात आले होते. नवीन जोड घेतल्यानंतर दिवसाआड व पूर्णदाबाने पाणीपुरवठा करण्याचे तोंडी आश्वासन येथील नागरिकांना दिले होते. प्रत्यक्षात मात्र या भागात नियमित मुबलक पाणीपुरवठा केला जात नसल्याचा आरोप येथील नागरिकांनी केला.
महापालिका आयुक्तांना ३० ऑक्टोबर रोजी निवेदन देऊन मुबलक पाणीपुरवठा न केल्यास रास्ता रोको आंदोलन करण्याचा इशारा नागरिकांनी दिला होता. महापालिकेने याकडे दुर्लक्ष केल्यामुळे अखेर अमितनगर, ताराबाग कॉलनी, एकता कॉलनी भागातील नागरिकांनी गुरुवारी दुपारी बाराच्या सुमारास कायनेटिक चौकाच्या पुढे असणाऱ्या उड्डाणपुलावर येऊन रस्त्यावर ठिय्या मांडत नगर-पुणे महामार्ग रोखला. अवघ्या काही मिनिटांमध्येच या महामार्गावर वाहनांच्या लांबचलांब रांगा लागल्या. पोलिसांनी घटनास्थळी धाव घेऊन रास्ता रोको आंदोलन मागे घेऊन महापालिकेच्या अधिकाऱ्यांसोबत चर्चा करण्याची आंदोलकांना विनंती केली. पण लेखी आश्वासन मिळेपर्यंत रस्त्यावरून उठणार नाही, अशी भूमिका आंदोलकांनी घेतली. सहायक पोलिस अधीक्षक डॉ. अक्षय शिंदे यांनीही रास्ता रोको आंदोलन घेण्याची विनंती केली. परंतु, त्यांनाही आंदोलकांनी प्रतिसाद दिला नाही. अखेर पोलिसांनी महापालिकेच्या अधिकाऱ्यांना आंदोलनाबाबत माहिती देऊन घटनास्थळी बोलावले. त्यानंतर उपायुक्त विक्रम दराडे यांनी पाणीपुरवठा विभागीत कर्मचाऱ्यांसह घटनास्थळी येऊन दिवसाआड मुबलक पाणी देण्याचे आश्वासन दिल्यामुळे हे आंदोलन मागे घेण्यात आले.
रुग्णवाहिकेला वाट देण्यासाठी धावपळ
रास्ता रोको आंदोलन सुरू झाल्यामुळे नगर-पुणे महामार्गावर वाहनांच्या लांबचलांब रांगा लागल्या होत्या. या आंदोलनामध्ये दोन रुग्णवाहिका अडकल्या होत्या. रुग्णवाहिकांना जाण्यासाठी वाट करून देण्याची विनंती पोलिसांनी आंदोलकांना केली. यावरून आंदोलकांमध्ये मतभेद सुरू झाले. अखेर पोलिसांनी रुग्णवाहिकेच्या समोरील सर्व गाड्या एका बाजूला घेऊन व दोन्ही रुग्णवाहिकांच्या मधोमध पोलिसांची गाडी ठेवून त्यांना वाट करून दिली. तर, आंदोलन सुटण्याची चिन्ह दिसत नसल्यामुळे चासवरून नगरच्या दिशेने येत असलेल्या वाहनांनी पुन्हा माघारी फिरून बाह्यवळण रस्त्याने जाणे पसंत केले.
वाहनांच्या गर्दीतून अधिकाऱ्यांनी काढली वाट
नगर-पुणे महामार्गावर वाहनांच्या लांबचलांब रांगा लागल्यामुळे पोलिस अधिकाऱ्यांसह महापालिकेच्या अधिकाऱ्यांना कायनेटिक चौकाजवळ आपली वाहने लावावी लागली. त्यानंतर वाहनांच्या गर्दीतून वाट काढत हे अधिकारी आंदोलनस्थळी पोहचले होते. दरम्यान, मनपाचे अधिकारी आंदोलनस्थळी आल्यानंतर पोलिसांनी रस्ता मोकळा करण्याच्या सूचना आंदोलकांना केली. परंतु, त्याला काही आंदोलकांनी नकार देताच पोलिसांनी यासर्वांना रस्त्याच्या बाजूला काढले. त्यानंतर उड्डाणपुलाच्या शेजारून जाणाऱ्या केडगाव देवी रोडवर आंदोलक व मनपाच्या अधिकाऱ्यांमध्ये चर्चा झाली. त्या ठिकाणी उपायुक्त विक्रम दराडे यांनी लेखी आश्वासन दिल्यानंतर हे आंदोलन मागे घेण्यात आले.
चौकट ः
वाहनचालकांची नाराजी
नगर-पुणे महामार्गावर सुरू झालेले आंदोलन लवकर मिटण्याची चिन्हे दिसत नसल्याने अनेक वाहनचालकांनी नाराजी व्यक्त केली. शाळेला जाणाऱ्या विद्यार्थ्यांसह महत्त्वाच्या कामानिमित्त बाहेर पडलेले अनेक वाहनचालक या आंदोलनामुळे अडकून पडले होते. दुचाकी चालकांना बाजूने वाट काढण्याचा प्रयत्न केला. परंतु, आंदोलकांनी त्यांना पुढे जाऊ दिले नाही. त्यामुळे अनेकांनी नाराजी व्यक्त केली.