महापालिकेचे कामकाज ठप्प

म. टा. प्रतिनिधी, नगर

दोन महिन्यांपासून थकित असलेले वेतन, तसेच तीन महिन्यांपासून थकित असलेले निवृत्तीवेतन मिळण्याच्या मागणीसाठी मनपा कामगार संघटनेने गुरुवारपासून काम बंद आंदोलन सुरू केले. त्यामुळे मनपाचे दैनंदिन कामकाज ठप्प झाले. या आंदोलनातून सायंकाळपर्यंत मार्ग निघाला नसल्याने शुक्रवारीही (१७ फेब्रुवारी) मुख्यालयासह चारही प्रभाग समित्यांचे कामकाज बंद राहण्याची शक्यता आहे.

सरकारने जानेवारी व फेब्रुवारीचे एलबीटी अनुदान दिले नसल्याने मनपा कामगार व कर्मचाऱ्यांचे या दोन महिन्यांचे पगार थकले आहेत. निवृत्तीवेतनधारकांचे डिसेंबर २०१६पासून तीन महिन्याचे वेतन थकले आहे. सरकारकडून अनुदान आल्यावर पैसे देण्याचे आश्वासन प्रशासन व पदाधिकाऱ्यांनी दिले आहे. पण हे अनुदान मिळविण्यासाठी राज्यात स्वपक्षांची सत्ता असूनही मनपातील शिवसेना-भाजपचे पदाधिकारी तसेच, प्रशासनही पुरेसे प्रयत्न करीत नसल्याचे संघटनेचे म्हणणे आहे. त्यामुळेच गुरुवारपासून संघटनेने काम बंद आंदोलन सुरू केले.

कामगार संघटनेचे अध्यक्ष अनंत लोखंडे, सरचिटणीस आनंद वायकर व अन्य पदाधिकाऱ्यांनी मनपासमोर द्वारसभा घेऊन पगार व निवृत्तीवेतन नसल्याने कामगार-कर्मचारी व निवृत्तीवेतनधारकांचे सुरू असलेले हाल मांडले. तातडीने हे पैसे अदा करण्याची मागणीही केली. स्थायी समितीच्या सदस्यांसमोरही गाऱ्हाणे मांडले व पैसे मिळाल्याशिवाय काम सुरू करणार नसल्याचेही स्पष्ट केले.