नगरच्या जिल्हा परिषदेत त्रिशंकू अवस्था

म.टा.प्रतिनिधी, शिर्डी

नगर जिल्हा परिषदेत कोणत्याही पक्षाला स्पष्ट बहुमत मिळाले नसले तरी काँग्रेस राष्ट्रवादी एकत्र आलेच तर बहुमचा आकडा पार होऊन पुन्हा सत्ता राखली जाऊ शकते. काँग्रेसने सर्वाधिक २३ तर राष्ट्रवादीने १८ जागा जिंकल्या आहेत. यावेळी भाजपला 'फोर्टी प्लस' ची घोषणा पालकमंत्री प्रा. राम शिंदे यांनी केली होती. मात्र सर्वाधिक साठ जागा लढवूनही भाजपला अवघ्या १४ जागांवर समाधान मानावे लागले आणि पक्ष तिसऱ्या स्थानावर फेकला गेला.

जिल्हा परिषदेच्या ७२ जागांच्या निवडणुकीचा निकाल गुरूवारी जाहीर झाला. कोणत्याच पक्षाला बहुमत मिळाले नाही. पालकमंत्री प्रा. राम शिंदे यांनी या निवडणुकीत ‘फोर्टी प्लस’चे मिशन राबविण्यासाठी भाजपसाठी जोरदार प्रचार मोहीम राबविली. मुख्यमंत्री, प्रदेशाध्यक्ष यांनाही प्रचारात उतरविले, पण भाजपच्या पदरी निराशाच आली. पंचायत समित्यांमध्ये मात्र भाजप आणि राष्ट्रवादीकडे प्रत्येकी तीन ठिकाणी सत्ता मिळाली आहे. तर अकोल्यात भाजप- सेना युतीला यश मिळाले आहे. तर पारनेर, कर्जत व श्रीरामपूर या तीन पंचायत समित्यांमध्ये कोणालाही बहुमत मिळालेले नाही. संगमनेर तालुक्यातील सर्व नऊ जागा काँग्रेसला मिळाल्या. कोपरगावमध्ये राष्ट्रवादीने पंचायत समिती ताब्यात घेतली. श्रीरामपूरमध्ये काँग्रेसने चारपैकी दोन गट जिंकले. पाथर्डीमध्ये भाजपच्या आमदार मोनिका राजळे व राजीव राजळे यांनी पंचायत समितीची सोबत जिल्हा परिषदेचे तीन गट जिंकले.

राहुरीत काँग्रेसची पकड काहीशी ढिली झाली. मागील वेळी काँग्रेसकडे पाच जागा होत्या. यावेळी त्यांचे बळ घटून तीनवर आले. माजी मंत्री मधुकर पिचड यांना अकोले तालुक्यात सहापैकी चार गट युतीने खेचले. राष्ट्रवादीला अवघे दोन गट पदरात पडले. अकोले, नेवासे, शेवगाव,पाथर्डी, जामखेड, कर्जत या तालुक्यात काँग्रेस ‘झिरो’ झाली.

काँग्रेस - २३

राष्ट्रवादी काँग्रेस - १८

भाजप - १४

शिवसेना - ७

शेतकरी क्रांती पक्ष - ५

श्रीरामपूरची महाआघाडी - २

जनशक्ती विचार मंच - १

कम्युनिस्ट पक्ष - १

अपक्ष - १

बहुतामतासाठी गरज - ३७