शहरात नालेसफाई अखेर सुरू

म. टा. प्रतिनिधी, नगर

प्रशासकीय अनास्थेमुळे लांबणीवर पडू पाहणारी शहरातील नालेसफाई मोहीम अखेर शुक्रवारी (१९ मे) सुरू झाली. शहरातील छोट्या नाल्यांच्या सफाईसाठी ८० कर्मचारी नियुक्त करण्यात आले आहेत. दरम्यान, मोठ्या नाल्यांच्या सफाईसाठीची निविदा मुदत शनिवारपर्यंत (२० मे) असल्याने कोण निविदा दाखल करणार व प्रत्यक्षात काम कधी सुरू होणार, याची उत्सुकता शहरवासियांना आहे.

दोन दिवसांपूर्वी महापौर सुरेखा कदम यांनी मनपात बैठक घेऊन शहरातील छोट्या नाल्यांची गुरुवारपासून सफाई सुरू करण्याचे आदेश दिले होते. मात्र, त्याबाबतचा प्रस्ताव, त्याची मंजुरी व कार्यारंभ आदेश प्रक्रियेत प्रशासनाने दिवस घालवल्याने गुरुवारपासून हे काम सुरू झाले नाही. अखेर पुन्हा पदाधिकाऱ्यांनी पाठपुरावा केल्याने ही प्रक्रिया तातडीने राबवून प्रत्यक्षात शुक्रवारपासून हे काम सुरू करण्यात आले. सिद्धार्थनगर व गवळीवाडा परिसरातील नाल्यांच्या सुरू झालेल्या सफाई कामाची पाहणी खुद्द महापौर कदम यांनीच केली. या वेळी नगरसेवक दीप चव्हाण, माजी नगरसेवक सुरेश तिवारी, घनकचरा विभाग प्रमुख डॉ. पैठणकर, स्वच्छता निरीक्षक भोर आदी उपस्थित होते.

पावसाळ्यापूर्वी शहरातील सर्व छोट्या नाल्यांची सफाई केली जाईल तसेच मोठ्या नाल्यांच्या सफाई निविदेस प्रतिसाद मिळाला नाही तर कोटेशन पद्धतीने हे काम सुरू करण्यात येणार असल्याचे महापौर कदम यांनी सांगितले. दरम्यान, शहरात सुरू असलेल्या नाले सफाईच्या कामाची कधीही व कोठेही जाऊन पाहणी करण्याचे महापौर कदम यांनी यानिमित्ताने स्पष्ट केले.