अंगणवाड्यांतील धड्यांना येणार ‘आकार’

म.टा.प्रतिनिधी,नगर

अंगणवाड्यांतील मुलांना अक्षरांची ओळख, बडबडगीते, वेगवेगळ्या चित्रांतून दिले जाणारे शिक्षण आता पुस्तक रुपात उपलब्ध होणार आहे. युनिसेफ व महाराष्ट्र राज्य शैक्षणिक संशोधन मंडळाने पहिल्यांदाच अंगणवाड्यांसाठी अभ्यासक्रम तयार केला असून थोड्याच दिवसांत या अभ्यासक्रमावर आधारित शिक्षण अंगणवाड्यांतून दिले जाणार आहे. यासाठी अंगणवाड्यांतील पर्यवेक्षक व अंगणवाडी सेविकांना प्रशिक्षण देण्यासाठी महिला बालकल्याण विभागाने नियोजन सुरू केले आहे.

अंगणवाड्यांतील मुलांना अक्षरांची ओळख करुन देणे, विविध गोष्टी किंवा उदाहरणे देऊन त्यांना शिक्षण देण्याचे काम शिक्षक वर्ग करत आहेत. या अभ्यासाची ठराविक पद्धती अस्तित्वात नव्हती. मुलांना अक्षरांची ओळख करुन देणे असाच उद्देश त्यामागे असायचा. परंतु, यामध्ये आता बदल करण्यात येऊन अंगणवाड्यांतील मुलांसाठीही अभ्यासक्रम निश्चित करण्यात आला आहे. अंगणवाड्यांतून मुलांना दिल्या जाणाऱ्या शिक्षणात फारसा बदल झालेला नाही.

अक्षरांची ओळख, बडबडगीते, अंकगणिताची माहिती, घोषवाक्यांतून शिक्षण या बाबींना साचेबद्ध करण्यात येऊन त्यास ‘आकार’ असे नाव देण्यात आले आहे. ही नवी अध्यापन पद्धती कशी आहे, यातून मुलांना कशा प्रकारे शिक्षण देणे अपेक्षित आहे, याची माहिती अंगणवाडी पर्यवेक्षक व अंगणवाडी सेविकांना व्हावी यासाठी त्यांना प्रशिक्षण देण्याचे नियोजन महिला बालकल्याण विभागाने केले आहे. ऑगस्ट महिन्यात प्रशिक्षणाचे वर्ग सुरू होणार आहेत. युनिसेफच्या सहा सदस्यांची टीम हे प्रशिक्षण देणार आहे. प्रशिक्षण पूर्ण झाल्यानंतर नव्या पद्धतीने शिकवले जाईल.

स्वनिधीतूनच करावा लागणार खर्च

अंगणवाड्यांत येऊ घातलेल्या या नव्या अभ्यासक्रमासाठी प्रशिक्षण दिले जाणार असले तरी त्यासाठी स्वतंत्र निधीची व्यवस्था सरकारने केलेली नाही. त्यामुळे या कामासाठी महिला बालकल्याणने सेस फंडातून निधीची तजवीज केली आहे. सेस फंडात प्रशिक्षणासाठी पाच लाखांचा निधी उपलब्ध असून या निधीतूनच हा खर्च भागविला जाणार आहे. त्यासाठीचे नियोजन पूर्ण झाले असून पर्यवेक्षकांच्या तुकड्या करुन प्रशिक्षण वर्गास लवकरच सुरुवात केली जाणार आहे.

अंगणवाड्यांतील मुलांना दिले जाणारे शिक्षण, विविध प्रकारचे धडे यांचाच या ‘आकार’ नावाच्या अभ्यासक्रमात समावेश आहे. यामध्ये क्रम निश्चित करण्यात आला असून लवकरच छापील पुस्तके अंगणवाड्यांत उपलब्ध होतील. प्रशिक्षण पूर्ण झाल्यानंतर नवीन पद्धतीतून शिक्षणास सुरूवात केली जाणार आहे.

– मनोज ससे, उपमुख्य कार्यकारी अधिकारी