कांकरिया ऑटोमोबाइलमधील प्रकार
म. टा. प्रतिनिधी, नगर
एमआयडीसीतील कांकरिया आटोमोबाइलमध्ये सेल्स विभागात असलेल्या कर्मचाऱ्याने २६ लाख ६१ हजार रुपयांच्या तीन कार गाड्या लंपास केल्या आहेत. या प्रकरणी कर्मचाऱ्याविरुद्ध एमआयडीसी पोलिस स्टेशनला विश्वासघात करणे व फसवणूक केल्याप्रकरणी गुन्हा नोंदविण्यात आला आहे.
बापूसाहेब भाऊसाहेब नवले (राहाता, नगर) असे आरोपीचे नाव आहे. कांकरिया आटोमोबाइलचे प्रदीप अनाजी सोनवणे यांनी फिर्याद दिली आहे. कांकरिया ऑटोमोबाइलमध्ये नवले हा सेल्स एक्झिक्युटिव्ह म्हणून काम करतो. राहाता येथील शोरुम येथे गाड्या विक्री करण्यासाठी नवले हा तीन कार घेऊन गेला. परंतु, या कार राहाता येथील शोरुममध्ये जमा न करता तीनही कारची त्याने परस्पर विल्हेवाट लावली. नवले याने चार महिन्यांपूर्वी असा प्रकार केला होता. परंतु, कारची विक्री व शिल्लक कारचा हिशेब जुळत नव्हता. कागदपत्रांची तपासणी केल्यानंतर नवले हा गेट पास करून कार विक्रीसाठी राहाता येथील शोरुमला नेला होता, असे स्पष्ट झाले; परंतु, या गाड्या शोरुममध्ये जमा केल्या नसल्याचे उघडकीस आले. त्यानंतर नवलेविरुद्ध फसवणुकीचा गुन्हा नोंदविण्यात आला. या शोरुममधून यापूर्वी एका कर्मचाऱ्याने अशाच पद्धतीने गाड्या नेऊन फसवणूक केली होती. याप्रकरणी एमआयडीसी पोलिस स्टेशनला गुन्हा नोंदविण्यात आला आहे.