म. टा. प्रतिनिधी, नगर
महसूल विभागातील अधिकाऱ्यांसाठी पाच नवीन गाड्या जिल्हा प्रशासनाच्या ताफ्यात दाखल झाल्या आहेत. लवकरच या गाड्यांचे वाटप संबंधित अधिकाऱ्यांना केले जाणार आहे.
महसूल विभागातील तहसीलदार, प्रांताधिकारी, उपजिल्हाधिकारी यांच्याकडे विविध सरकारी योजना विकासकामे गतिमान करण्यासाठी, या योजनांच्या अंमलबजावणीसाठी जबाबदारी निश्चित करण्यात येते. यासाठी आपल्या कार्यक्षेत्रात या अधिकाऱ्यांना प्रतिदिन दौरे करावे लागतात. याशिवाय उपविभागीय स्तरावर आणि जिल्हास्तरावर होणाऱ्या महत्त्वाच्या सरकारी बैठकांसाठीसुद्धा या अधिकाऱ्यांना उपस्थित राहावे लागते. त्यामुळे या जबाबदार अधिकाऱ्यांकडे सरकारी वाहन असणे गरजेचे असते. परंतु, मागील काही वर्षापासून जिल्हा प्रशासनात असणाऱ्या अधिकाऱ्यांना वाहनांची कमतरता होती. त्यामुळे प्रशासनाने राज्य सरकारकडे वाहनांची मागणी नोंदवली होती; मात्र, ही वाहने मिळण्यास विलंब लागत होता. अखेर राज्य सरकारकडून जिल्हा प्रशासनातील अधिकारी यांच्यासाठी पाच वाहने मिळाली आहेत. ही पाचही वाहने सध्या जिल्हाधिकारी कार्यालयाच्या आवारात आहेत. वाहनांची नोंदणीची प्रक्रिया पूर्ण झाल्यानंतर ती जिल्ह्यातील पाच तहसीलदारांना देण्यात येणार आहे. याशिवाय अजून एक वाहन लवकरच जिल्हा प्रशासनाला मिळणार असून ते वाहन प्रांताधिकारी यांना दिले जाणार आहे.