निवृत्तीनाथ पालखी सोहळ्यात
विश्वहिंदू परिषदेची आरोग्य सेवा
वारकऱ्यांना दिले औषधोपचार
म. टा. प्रतिनिधी, नगर
संतश्री निवृत्तीनाथ महाराजांच्या त्र्यंबकेश्वर ते पंढरपूर पायी दिंडी सोहळ्यातील वारकऱ्यांना मोफत आरोग्य सेवेचा प्रारंभ विश्व हिंदू परिषदेच्या वतीने मंगळवारी येथे करण्यात आला. पालखी व दिंडीतील वारकऱ्यांची तज्ज्ञ डॉक्टरांद्वारे तपासणी करून त्यांना आवश्यक औषधे देण्यात आली.
त्र्यंबकेश्वरहून निघणाऱ्या निवृत्तीनाथ पालखीतील वारकऱ्यांसाठी विश्व हिंदू परिषदेद्वारे नाशिकपासूनच वैद्यकीय सेवा दिली जाते. नगरला येथील स्थानिक कार्यकर्त्यांद्वारे ही सेवा दिली जाते. मंगळवारी मार्केटयार्डमध्ये असलेल्या या पालखीच्या वारकऱ्यांसाठी दिल्या गेलेल्या या सेवेचे उदघाटन संत निवृत्तीनाथ महाराज संस्थानचे अध्यक्ष संजयनाना धोंडगे महाराज यांच्या हस्ते झाले. यावेळी विश्वहिंदु परिषदेचे दिंडी आरोग्य सेवा प्रमुख रवींद्र मराठे, विश्वास चितळे, जिल्हा आरोग्य सेवा प्रमुख सुधीर लांडगे, डॉ. मनोहर देशपांडे, डॉ. मालिकार्जुन शेजाळे, पथक प्रमुख अरविंद ब्राह्मणकर, जिल्हा सह मंत्री डॉ. प्रदीप उगले, गजेंद्र सोनवणे, शहर मंत्री अनिल देवराव, बजरंग दल जिलाध्यक्ष गौतम कराळे, प्रसिद्धीप्रमुख अमोल भांबरकर, अरविंद चाबुकस्वार, बाली जोशी, राजेंद्र चुंबळकर, सुरेंद्र सोनवणे, सागर होनराव, विशाल रायमोकर, दत्ता घोलप, हावरे, नाशिकचे स्वयंसेवक ऋषिकेश काळे, अशोक गीते, सोमनाथ ठुबे, अनुज उदावंत, निंबाळकर, कपिल पवार, चंद्रभान झाडे तसेच पुणे येथील स्वयंसेविका भारती बनबेरू, सुरेखा घुले आदी उपस्थित होते. या सेवेत २ अॅम्ब्युलन्स, ३ डॉक्टर, २ सिस्टर, १० स्वयंसेवक व १ पाण्याचा टँकर अशी सुविधा देण्यात आली आहे.
सोहळा उत्साहात
संत निवृत्तीनाथांचा ७२१वा संजीवन समाधी सोहळा मंगळवारी हमाल पंचायतीच्या प्रांगणात उत्साहात झाला. हमाल पंचायतीचे अध्यक्ष अविनाश घुले यांच्या पुढाकाराने त्याचे आयोजन करण्यात आले होते. पहाटे संत निवृत्तीनाथ पादुकांची महापूजा झाली. सकाळी १० वाजता कीर्तन सेवा होऊन दुपारी बारा वाजता पादुकांवर फुलांचा वर्षाव करण्यात आला. या वेळी हरिनामाचा गजर सुरू होता. भाविकांची दर्शनासाठी दिवसभर गर्दी झाली होती. ही पालखी बुधवारी (११ जुलै) सकाळी ९ वाजता पंढरपूरकडे प्रस्थान ठेवणार आहे.