‘नो हेल्मेट नो पेट्रोल’ अशक्य

म. टा. प्रतिनिधी, नगर ‘पेट्रोलसाठी हेल्मेटची सक्ती करायची, म्हणजे पेट्रोलपंप चालकांना ग्राहकांशी वाद घालावा लागेल. दुचाकी चालकाने हेल्मेट घालावे, यासाठी पोलिस कारवाई करीत असतात. परंतु त्यानंतर देखील हेल्मेट वापरले जात नाही. त्यामुळे दुचाकी चालक हे पोलिसांचे ऐकत नसतील, तर आमचे काय ऐकणार आहेत, अशा संतप्त भावनाच पेट्रोलपंप चालकांनी व्यक्त केल्या आहेत. त्यामुळे ‘नो हेल्मेट नो पेट्रोल’ या आदेशावरुन पेट्रोलपंप चालक व सरकार यांच्यामधील संघर्ष पेटण्याची चिन्ह असून याबाबत निर्णय घेण्यासाठी फेडरेशन ऑफ ऑल महाराष्ट्र पेट्रोलिअम डीलर असोसिएशनची लवकरच बैठक होणार असल्याची माहिती मिळत आहे. दुचाकी चालकाने हेल्मेट घातले नसेल तर त्याला पेट्रोल देण्यात येऊ नये, असा आदेश काढत ‘नो हेल्मेट-नो पेट्रोल’ असा निर्णय राज्य सरकारने घेतला आहे. या निर्णयाची अंमलबजावणी एक ऑगस्टपासून करण्यात येणार आहे. त्यामुळे सरकारने काढलेल्या आदेशाची प्रत्यक्षात नगर शहरात अंमलबजावणी अशक्य असल्याचे मत पेट्रोल पंप चालकांकडून मांडले जात आहे. अहमदनगर जिल्हा पेट्रोलिअम डीलर असोसिएशनचे अध्यक्ष चारुदत्त पवार यांनी ‘मटा’शी बोलताना सांगितले की, सरकारच्या आदेशाची अंमलबजावणी केली तर पेट्रोल पंपावर वाद वाढण्याची शक्यता आहे. ग्राहक व पेट्रोलपंप चालक यांचे संबंध खराब होतील. पेट्रोलपंप चालकाचे आर्थिक नुकसान होईल. त्यामुळे सरकारने घेतलेल्या निर्णयाबाबत चर्चा करण्यासाठी पेट्रोलिअम डीलर असोसिएशनची २८ जुलै रोजी बैठक होणार आहे. त्यामध्ये सरकारने घेतलेल्या निर्णयाबाबत सविस्तर विचार करण्यात येईल. ग्राहकांनी हेल्मेट घातले नाही, म्हणून आमच्यावर कारवाई करणे योग्य नाही. सरकारने या निर्णयाचा फेरविचार करण्याची गरज आहे.’ तर नगर-औरंगाबाद रोडवरील एका पेट्रोलपंप चालकाने नाव न छापण्याच्या अटीवर सांगितले की, ‘आदेशाच्या अंमलबजावणीची जबाबदारी राज्य सरकारने सर्व तेल कंपन्या, पेट्रोल पंप चालक, प्रादेशिक परिवहन अधिकारी आणि वाहतूक पोलिस यांच्यावर टाकली आहे. १ ऑगस्टपासून लागू होणाऱ्या या निर्णयाची अंमलबजावणी पोलिस व पेट्रोल पंपचालकांची कसोटी पाहणार आहे. कारण ग्राहकांना हेल्मेट नसल्यामुळे पेट्रोल देण्यास नकार दिला, तर पेट्रोल पंपावर वाद होतात. बऱ्याचवेळा ग्राहक पेट्रोलपंप चालकांच्या अंगावर धावून येतात. त्यामुळे हेल्मेट असो किंवा नसो, पेट्रोलचे वाटप करण्यात येत आहे.’ त्यामुळे सरकारने घेतलेल्या निर्णय प्रत्यक्षात येण्यास फारसा उपयोग झाली नसल्याची स्थिती सध्या तरी शहरामध्ये आहे.

पोलिस सुद्धा विना हेल्मेट

पोलिस अधिकारी व कर्मचाऱ्यांनी सरकारी, तसेच खासगी दुचाकी वाहने चालविताना हेल्मेटचा वापर करावा. जे कर्मचारी वाहतूक नियमांचे पालन करणार नाहीत, त्यांच्यावर कडक कारवाई करावी, असा आदेश पोलिस अधीक्षक सौरभ त्रिपाठी यांनी फेब्रुवारी २०१६ मध्ये दिला होता. त्यानंतर शहरामध्ये दुचाकीवर फिरणारे पोलिस हेल्मेट वापरताना दिसत होते. परंतु आता पोलिस अधीक्षकांच्या आदेशाचा कर्मचाऱ्यांना विसर पडला असून, सर्रास हेल्मेट न घालता पोलिस दुचाकीवरून फिरत आहेत. त्यामुळे ‘नो हेल्मेट- नो पेट्रोल’ आदेशाची अंमलबजावणी करण्याची जबाबदारी असणारे वाहतूक पोलिस तरी स्वतः हेल्मेट घालणार का, हा प्रश्न आहे.