मोबाइलला रेंज नाही; मतदानावर बहिष्कार

म. टा. वृत्तसेवा, संगमनेर

डिजिडल इंडिया, अद्ययावत महाराष्ट्र अशा मोठमोठ्या घोषणा सध्या केंद्रातील व राज्य सरकार करीत आहे; मात्र, जीवनाश्यक बाब ठरलेल्या मोबाइलला राज्यातील अनेक गावांत रेंजच नाही. कारण त्या ठिकाणी ना सरकारी यंत्रणेने नेटकर्वची सेवा पुरविणारे टॉवर उभारले ना खासगी कंपन्यांनी. संगमनेर तालुक्यामधील सुमारे १५ गावांमध्ये आज ही परिस्थिती आहे. त्यामुळे जोपर्यंत या गावांत नेटवर्कची सेवा पुरविणाऱ्या सर्वच कंपन्या टॉवर उभारत नाहीत, तो पर्यंत निवडणुकांवर बहिष्कार घालण्याचा निर्णय ग्रामोस्थांनी घेतला आहे.

तालुक्यातील तांगडी, आंबीखालसा, बोरबन, सावतानगर, सराटी, खोबरेवाडी, वनकूटे, भोजदारी, कोठे, कुरकुंडी, खांडगेदरा, पेम्प्रेवाडी, बांबळेवाडी, सांगळे वाडी आदी आणि परिसरातील सर्वच गावांतील गावकरी मोबाइलला रेंजच मिळत नसल्याने त्रस्त आहेत. या गावांची एकूण लोकसंख्या काही हजारांमध्ये आहे. त्यातील सुमारे ७५ टक्के जनता मोबाइलचा वापर करते. मोबाइल सेवा पुरविणाऱ्या खासगी आणि सरकारी अशा दोन्ही यंत्रणांबरोबर चर्चा करण्यात आली; मात्र, दोन्हींकडूनही प्रतिसाद मिळत नसल्याने ग्राहस्थांनी आगामी सर्वंच निवडणुकांमध्ये कोणालाही मतदान न करण्याचा निर्णय एकमुखाने घेतला आहे.

खासगी कंपन्यांनी लोकसंख्येचे कारण देत या भागाकडे पाठ फिरवली आहे, तर चार वर्षांपूर्वी पेंम्प्रेवाडी येथे बीएसनएलचा टॉवर मंजूर झाला आहे. त्यासाठी आवश्यक असलेली तयारीदेखील पूर्ण झाली आहे; मात्र, अजूनही प्रत्यक्ष कामला सुरुवात करण्यात आलेली नाही. या संदर्भात आम्ही नगरमधील बीएसनएलच्या अधिकाऱ्यांशी संपर्क साधला होता; मात्र, त्यांनी उडवाउडवीची उत्तरे दिली. मुंबई विभागाला ई-मेल केला असून काही प्रतिसाद मिळत नाही. काही दिवसांपूर्वी आम्ही बीएसएनएलचे मुंबई विभागाचे पीयूष खरे यांची भेट घेतली होती. त्यांनी ही समस्या पुढील ४ ते ५ वर्षे सुटणार नाही, तसेच साधने आली तर लोकसंख्येप्रमाणे पुण्यासारख्या शहरामध्ये देऊ, असे सांगितले, अशी माहिती तांगडी येथील बजरंग तांगडकर यांनी दिली.