उपनगरांमध्ये उद्या पाणीपुरवठा नाही

म.टा.प्रतिनिधी,नगर

शहराच्या पाणीपुरवठा योजनेच्या वीज पुरवठा यंत्रणेच्या दुरुस्ती कामासाठी महावितरण कंपनीद्वारे शनिवारी (७ ऑक्टोबर) सकाळी ११ ते दुपारी २ असे तीन तास शट डाऊन घेतले जाणार असल्याने या दिवशी सकाळी ११नंतर पाणीपुरवठा होणाऱ्या उपनगरांच्या भागास पाणीपुरवठा होणार नसल्याचे महापालिकेने कळवले आहे.

मुळा धरणावरील ३३ केव्ही वीज रोहित्राच्या दुरुस्तीकामासह अन्य तांत्रिक दुरुस्तीसाठी तीन तास पाणी योजनेचा वीज पुरवठा बंद ठेवला जाणार आहे. यामुळे मुळा धरणातून पाणी उपसाही या काळात बंद राहणार आहे. परिणामी, शनिवारी ११ वाजल्यानंतर पाणीपुरवठा होत असलेल्या बोल्हेगाव, नागापूर, सावेडी उपनगरातील गुलमोहोर रोड, पाइपलाइन रोड, लक्ष्मीनगर, सूर्यनगर, निर्मलनगर, मुकुंदनगर तसेच स्टेशन रोड, सारसनगर, विनायकनगर, मुकुंदनगर, केडगाव, नगर-कल्याण रोडवरील शिवाजीनगर भागास पाणीपुरवठा होणार नाही. तसेच रविवारी (आठ ऑक्टोबर) शहराच्या मध्यवर्ती भागातील सर्जेपुरा, तोफखाना, सिद्धार्थनगर, लालटाकी, दिल्लीगेट, नालेगाव, झारेकर गल्ली परिसर, चितळे रोड, माळीवाडा आदी भागास उशीरा व कमी दाबाने पाणीपुरवठा होणार आहे.