आता पाण्याचे आव्हान

म. टा. प्रतिनिधी, नगर

नगरच्या राजकीय वर्तुळात गाजत असलेल्या बुरुडगाव रोडवरील समर्थनगर पाण्याच्या टाकीची डागडुजी महापालिकेने सुरू केली असली तरी आता या टाकीचे लिकेज व अन्य त्रुटी तपासण्यासाठी त्यात भरावयाच्या पाण्याची उपलब्धता अडचणीची झाली आहे. तब्बल सुमारे १० लाख लिटर पाणी क्षमता असलेल्या या टाकीत भरण्यासाठी शहराच्या काही भागातील पाणीपुरवठा बंद करावा लागणार आहे. त्यामुळे या पाणी उपलब्धतेचे आव्हान मनपा प्रशासनासमोर आहे. दरम्यान, या टाकीशी संबंधित सारसनगरचे पाण्याचे राजकारणही रंगतदार होण्याच्या स्थितीत आहे.

दहा वर्षांपूर्वी समर्थनगरची पाण्याची टाकी बांधली गेली आहे. तिला इनलेट-आऊटलेट केले नसल्याने ती नुसती बांधून पडली होती. फेज-२ योजनेअंतर्गत इम्पिरियल चौकातून या टाकीजवळ पाण्याची पाइपलाइन आणली गेली. पण पुढे टाकीला जोडली गेली नव्हती. या टाकीअंतर्गत असलेल्या सारसनगर परिसरातील नानाजी नगर, चिपाडे मळा, आंबेकर मळा, औसरकर मळा, ओम कॉलनी व भागाला ७-८ वर्षांपासून टँकरने पाणीपुरवठा सुरू आहे. टाकीद्वारे पाणीपुरवठा न करता टँकरद्वारे पाणी देऊन कोट्यवधीचा खर्च केला गेल्याचे व त्यात भ्रष्टाचार होत असल्याचे आरोप होत आहेत.

शिवसेनेच्या नगरसेविका सुनीता फुलसौंदर यांनी समर्थनगर टाकी सुरू करण्याची मागणी केल्यानंतर याविषयीचे राजकारण पेटले. भाजपचे खासदार दिलीप गांधी, सेनेच्या महापौर सुरेखा कदम, राष्ट्रवादी काँग्रेसचे विरोधी पक्षनेते बाळासाहेब बोराटे, माजी नगरसेवक प्रकाश भागानगरे व अन्य मंडळी एकमेकांवर दोषारोप करू लागली आहेत. भाजपचे उपोषण आंदोलनाच्या पार्श्वभूमीवर टँकरचालकाचे कथित मारहाण प्रकरणानंतर व राष्ट्रवादी काँग्रेसच्या महिला मोर्चानंतर हा वाद चांगलाच पेटला आहे. तर दुसरीकडे मनपा प्रशासनाने दहा वर्षांपासून पडून असलेल्या समर्थनगर टाकीची दुरुस्ती सुरू केली असून, आतल्या भागात सिमेंटचा थर दिला जात आहे. कोलकात्याहून सुमारे ६० हजार रुपये किमतीचा मोठ्या आकाराचा पाणी व्हॉल्व्हही आणला आहे. पाणी टाकण्यासाठी व वितरणासाठीच्या पाइपचीही जोडाजोडी सुरू आहे. पण आता टाकीत टाकण्यासाठी १० लाख लिटर पाणी आणायचे कोठून, याचा प्रश्न प्रशासनासमोर आहे. टाकीत पाणी साठवून ती कोठे लिकेज होते का वा अन्य काही त्रुटी शोधायच्या आहेत. पण सध्याच्या शहराच्या विस्कळित पाणीपुरवठ्याच्या वातावरणात १० लाख लिटर पाण्याची उपलब्धता आव्हानात्मक असल्याने दुरुस्ती होऊनही प्रत्यक्षात टाकीत पाणी पडेल की नाही, याची शाश्वती मनपाचे अधिकारीही देण्यास धजत नाहीत.

चौकट ः

मान्यवरांचा परिसर

सारसनगर-बुरुडगाव परिसर मान्यवरांचा मानला जातो. भाजपचे खासदार दिलीप गांधी, राष्ट्रवादी काँग्रेसचे आमदार अरुण जगताप व संग्राम जगताप, शिवसेनेचे माजी महापौर भगवान फुलसौंदर, मनसेचे गटनेते गणेश भोसले अशी दिग्गज राजकीय मंडळी या भागाचे रहिवासी असल्याने येथील टाकीचे रखडलेले काम, सारसनगरचा पाणीप्रश्न व टँकरचे अर्थकारणाचे विषय या सर्वांभोवती फिरू लागल्याचे चित्र आहे.