अर्ज विक्री पोचली साडेआठशेवर
म. टा. प्रतिनिधी, नगर
महापालिका निवडणुकीसाठी ऑनलाइन उमेदवारी दाखल करणारांची संख्या १७५ इतकी झाली आहे. विशेष म्हणजे यापैकी अजून कोणीही ऑफलाइन अर्ज दाखल केलेला नाही. पहिल्या दिवशी शीतल भुजबळ यांचा एकमेव ऑफलाइन अर्ज आला आहे. दरम्यान, उमेदवारी अर्जां विक्रीही साडेआठशेवर पोहोचली आहे.
उमेदवारी अर्ज दाखल करण्याची प्रक्रिया मागील मंगळवारपासून (१३ नोव्हेंबर) सुरू झाली आहे. पहिल्या दिवशी १७, दुसऱ्या दिवशी ७९ व गुरुवारी तिसऱ्या दिवशीही ७९ ऑनलाइन अर्ज दाखल झाले. उमेदवारी दाखल करण्यासाठी १८ नोव्हेंबरचा रविवार वगळता अजून चार दिवस असल्याने उमेदवारीची संख्या आणखी वाढणार आहे. अनेक विद्यमान नगरसेवक व अन्य इच्छुक आणि त्यांचे समर्थक आवश्यक कागदपत्रे जमवण्यात व्यस्त आहेत.
उमेदवारी अर्जांनाही मागणी
१०० रुपयांना मिळणाऱ्या कोऱ्या उमेदवारी अर्जांनाही मागणी वाढली आहे. मागील तीन दिवसात ८५५ अर्ज विकले गेले आहेत. बहुतांश उमेदवार कोऱ्या उमेदवारी अर्जांवर वकील, सीए व अन्य तज्ज्ञ मंडळींकडून माहिती भरून घेतात व त्यानंतर या माहितीनुसार सायबर कॅफेद्वारे राज्य निवडणूक आयोगाच्या वेबसाइटवर ऑनलाइन अर्ज दाखल करीत आहेत. त्यामुळे कोऱ्या अर्जांचीही मागणी वाढली आहे. पहिल्या दोन दिवसात ६४३ अर्ज विकले गेले होते. गुरुवारी आणखी २१२ अर्ज विकले गेले आहेत.
--
काँग्रेसचे ढोणे सेनेत
युवक काँग्रेसचे माजी शहराध्यक्ष गौरव ढोणे यांनी जोरदार शक्तीप्रदर्शन करीत गुरुवारी शिवसेनेत प्रवेश केला. संपर्कप्रमुख भाऊ कोरगावकर व उपनेते अनिल राठोड यांनी पक्षात त्यांचे स्वागत केले. या वेळी जिल्हाप्रमुख शशिकांत गाडे, घनश्याम शेलार, नगरसेवक विक्रम राठोड, सुरेश तिवारी, अशोक दहिफळे आदी उपस्थित होते. ढोणेंचा सेना प्रवेश काँग्रेससाठी धक्कादायक मानला जात आहे. ते प्रभाग ९ मधून सेनेकडून लढणार आहेत. सेना प्रवेशाबद्दल व उमेदवारीबद्दल ढोणे यांनी सेना नेत्यांविषयी कृतज्ञता व्य़क्त केली. भविष्यात अनिल राठोड यांना विधानसभेत पाठविण्यासाठी आम्ही कटीबद्ध राहू, अशी ग्वाहीही दिली. या वेळी त्यांच्यासमवेत प्रसाद ढोणे, सूरज राठोड, सागर गुडा, राजू देशमुख, विजय पाचारणे, विजय जरे, बाळासाहेब लिमकर, दिनेश मद्रसकर, सागर बत्तीन, भरत राठोड, बद्रीनाथ राठोड, अक्षय नागापुरे, बंटी चव्हाण, सादिक शेख आदींसह कार्यकर्ते उपस्थित होते.