सदस्यांकडून झेडपीकडे होतेय विचारणा
म. टा. प्रतिनिधी, नगर
कामरगाव प्राथमिक शाळेतील पोषण आहार तसेच राहुरी तालुक्यातील पोषण आहाराच्या तपासणीचे अहवाल अजूनही मिळालेले नाहीत. अहवाल नसल्याने पुढील कार्यवाही करता आलेली नाही. कामरगाव शाळेतील पोषण आहाराचे नमुने अन्न औषध विभागाच्या अधिकाऱ्यांनी तपासणीसाठी पाठवले होते. तर राहुरी तालुक्यातील शाळेतील आहाराचे नमुने शिक्षण विभागाने जिल्हा प्रयोगशाळेत पाठवले आहेत. या दोन्ही प्रयोगशाळांचे अहवाल मिळालेले नाहीत. संबंधीत सदस्य मात्र अहवालाबाबत सातत्याने विचारणा करत आहेत.
कामरगाव शाळेत पोषण आहारात वापरले जाणारे मीठ निकृष्ट असल्याची तक्रार पंचायत समितीचे सभापती रामदास भोर यांनी केली होती. त्यामुळे पोषण आहाराची तपासणी करण्याची मागणी एफडीएकडे करण्यात आली होती. त्यानुसार एफडीएच्या अधिकाऱ्यांनी पोषण आहारातील मीठ, सोयाबीन, हळदीचे नमुने तपासणीसाठी घेतले. तपासणीसाठी नमुने पाठवण्यात आले आहेत. या कार्यवाहीस महिना उलटून गेला तरी देखील तपासणी अहवाल मिळालेले नाहीत. अहवाल नसल्याने अधिकाऱ्यांनाही पुढील कार्यवाही करता येणे शक्य नाही. तपासणी अहवाल कधीपर्यंत मिळतील याबाबत अधिकाऱ्यांनाही निश्चित माहिती नाही. नगर जिल्ह्यात एफडीएची प्रयोगशाळा नाही. त्यामुळे तपासणीसाठी घेतले जाणारे खाद्य पदार्थांचे नमुने दुसऱ्या शहरातील प्रयोगशाळेत पाठवावे लागतात. त्यामुळे अहवाल मिळण्यासही वेळ लागतो. काही वेळेस तर तीन महिने उलटून गेल्यानंतरही अहवाल मिळत नाहीत. तपासणी अहवाल मिळण्यास एवढा वेळ लागत असल्याने पुढील कार्यवाही करता येत नाही. दरम्यान, पोषण आहाराची तपासणी एफडीएकडून करुन घेण्याचे आदेश दोन वर्षांपुर्वीच देण्यात आले आहेत. या आदेशाची जिल्ह्यात अंमलबजावणी झालेली नाही. पोषण आहाराची तपासणी एफडीएकडून होत नाही. जिल्ह्यात प्रयोगशाळा नसल्यानेही विभागाच्या अडचणी वाढल्या आहेत. जिल्ह्यात प्रयोगशाळा सुरू होण्याची आवश्यकता असली तरी याबाबत ठोस कार्यवाही झालेली नाही.