मोबाइल टॉवर निधीतून बिले देण्यास आक्षेप

म. टा. प्रतिनिधी, नगर

महापालिकेच्या मोबाइल टॉवर लेखाशीर्षातून विविध कामांची बिले देण्यास राष्ट्रवादी काँग्रेसचे नगरसेवक संजय घुले यांनी आक्षेप घेतला आहे. यासंदर्भात त्यांनी महापालिकेचे लेखाधिकारी दिलीप झिरपे यांना पत्र दिले असून, या लेखाशीर्षातून बेकायदा बिले दिली गेल्यास शासकीय पैशांचा गैरवापर केल्याबद्दल फौजदारी गुन्हा दाखल करण्याचा इशाराही त्यांनी दिला आहे.

महापालिकेने शहरातील मोबाइल टॉवरकडील मालमत्ता कर व दंड रकमेचे संकलन करून त्याच्या विनियोगासाठी अंदाजपत्रकात स्वतंत्र लेखाशीर्ष केले आहे. यात जमा होणाऱ्या पैशांतून विविध कामांची बिले काढण्याचे प्रकार सुरू असल्याचा घुले यांचा दावा आहे. मोबाइल टॉवर लेखाशीर्षाखाली जमा झालेला मालमत्ता कर वेगळ्या खात्यात भरून विविध कामांची बिले काढली जात असून, हा शासकीय पैशांचा दुरुपयोग होत असल्याचे त्यांचे म्हणणे आहे. यासंदर्भात केलेल्या तक्रारीची शहानिशा होईपर्यंत या निधीतून कोणत्याही कामाचा धनादेश काढला जाऊ नये, अशीही मागणी त्यांनी केली आहे. अशा पद्धतीने विकासकामांची बिले दिली गेल्यास शासकीय पैशांचा गैरवापर केल्याबद्दल फौजदारी गुन्हा दाखल करण्याचा इशाराही त्यांनी दिला आहे.