दालनाला टाळे, फोन कनेक्शन तोडले

म. टा. प्रतिनिधी, नगर

जिल्हा परिषद व पंचायत समिती निवडणुकीच्या आचारसंहितेचे काटेकोर पालन करण्याचे आदेश दिल्यानंतर जिल्हा परिषदेतील पदाधिकाऱ्यांच्या दालनाला मंगळवारी टाळे ठोकण्यात आले. येथील फोनचे कनेक्शन तोडून कर्मचाऱ्यांना त्यांच्या मूळ नियुक्तीच्या ठिकाणी हजर करून घेण्यात आले.

जिल्हा परिषदेची निवडणूक पुढील महिन्यात होणार आहे. या निवडणुकीची आचारसंहिता लागू झाली आहे. आचारसंहितेच्या काळात पदाधिकारी जिल्हा परिषदेत फिरकत नसले तरी त्यांची दालने मात्र उघडीच असायची. येथे कार्यरत कर्मचाऱ्यांना त्यांना मूळ नियुक्तीच्या ठिकाणी हजर होण्याचे आदेश असतानाही कर्मचारी येथेच बसलेले असायचे. हा प्रकार वरिष्ठ अधिकाऱ्यांच्या लक्षात आल्याने त्यांनी दालने तत्काळ बंद करण्याचे आदेश दिले. त्यामुळे या दालनांना टाळे ठोकण्यात आले आहे. दालनातील फोनचे कनेक्शन तोडण्याचे पत्र निवडणूक शाखेने जिल्हा परिषदेला दिले होते. त्यानुसार येथील लँडलाइन फोनचे कनेक्शन तोडल्याचे सामान्य प्रशासन विभागातून सांगण्यात आले.