जुन्या शाळांची होणार तपासणी

म. टा. प्रतिनिधी, नगर
नगर तालुक्यातील निंबोडी येथील प्राथमिक शाळा खोलीचे छत कोसळून विद्यार्थ्यांचा मृत्यू झाल्याने खडबडून जाग्या झालेल्या जिल्हा परिषदेने जुन्या शाळा बांधकामांची तपासणी करण्याचा निर्णय घेतला आहे. सन २००० पूर्वीच्या सर्व शाळा खोल्यांच्या बांधकामांची जिल्हा परिषदेच्या बांधकाम विभागाकडून तपासणी केली जाणार असून तशा सूचना बांधकाम विभागाच्या अधिकाऱ्यांना देण्यात आल्या आहेत. तपासणीचे हे काम तत्काळ सुरू केले जाणार आहे.
जिल्हा परिषदेच्या प्राथमिक शाळा खोल्यांची अवस्था दयनीय झाली आहे. यातील अनेक खोल्या धोकादायक झाल्या आहेत. या धोकादायक शाळा खोल्या पाडण्याकडे दुर्लक्ष झाल्याने खोल्या पडण्याचे प्रकार सुरू झाले आहेत. नगर तालुक्यातील निंबोडी प्राथमिक शाळेची खोली पडल्यानंतर जिल्ह्यातील जुन्या झालेल्या सर्वच शाळा खोल्यांच्या बांधकामांची तपासणी करण्याचा निर्णय घेण्यात आला आहे. या बांधकामाची तपासणी करुन धोकादायक शाळा खोल्या निश्चित केल्या जाणार आहेत. धोकादायक शाळाखोल्यांची पाहणी या अगोदरही झाली आहे. त्यानंतर आता पुन्हा हा निर्णय घेण्यात आला आहे. यावेळी मात्र सन २००० पुर्वीच्या बांधकामांची तपासणी करण्याच्या सूचना दिल्या आहेत. त्यामुळे या कामात प्रशासनाकडून काय कार्यवाही होते हे पाहणे महत्वाचे ठरणार आहे.
निंबोडी येथील शाळेचे छत कोसळल्यानंतर जिल्हा परिषदेचे अधिकारी घटनास्थळी दाखल झाले. बांधकाम विभागाचे अभियंताही हजर होते. शाळेचे बांधकाम कधीचे आहे, शाळा इमारत धोकादायक झाली होती का, धोकादायक असल्याची काही नोटीस आहे का याची माहिती घेण्याचे काम प्रशासनाने सुरू केले आहे. या चौकशीतून पुढील कार्यवाहीची दिशा स्पष्ट होणार आहे.

प्रशासनावर जबाबदार

निंबोडी प्राथमिक शाळेचे बांधकाम सन १९९७-९८ सालातील असल्याची प्राथमिक माहिती समोर येत आहे. शाळेचे बांधकाम जुने झाले होते. शाळा पाडण्याची गरज होती. परंतु, प्रशासनाकडून याकडे दुर्लक्ष झाल्याने या घटनेस प्रशासन जबाबदार असल्याचा आरोप आमदार शिवाजी कर्डिले आणि आमदार संग्राम जगताप यांनी केला आहे. या घटनेस प्रशासन जबाबदार धरून दोषींवर कारवाई करण्याची मागणी त्यांनी केली आहे.