म. टा. प्रतिनिधी, नगर
कोल्हापूर, सांगली येथील पूरग्रस्तांच्या मदतीसाठी पोलिस क्रेडीट सोसायटीच्या वतीने मुख्यमंत्री सहायता निधीसाठी एक लाख रुपयांची मदत देण्यात आली. पोलिस अधीक्षकांकडे मदतीचा धनादेश सुपूर्द केल्यानंतर तो मुख्यमंत्री सहाय्यता निधीसाठी पाठविण्यात आला आहे.
पोलिस मुख्यालयात पोलिस क्रेडीट सोसायटीच्या वतीने पूरग्रस्तांच्या मदतीसाठी एक लाख रुपयांचा धनादेश सोसायटीचे चेअरमन राजू सुद्रिक यांनी पोलिस अधीक्षक ईशू सिंधू यांच्याकडे सुपूर्द करण्यात आला. या वेळी संचालक सुमन दिघोळे, संजय चोरडिया, राजू वैरागर, दिनेश मोरे, अंजली बर्डे, लक्ष्मण खोकले, प्रकाश पाठक, भाऊसाहेब निमसे, सचिन शिरसाठ, बाळासाहेब कणगरे, सतीश भांड, दीपा आठवले, प्रसाद आळकुटे उपस्थित होते. या वेळी पोलिस अधीक्षक सिंधू म्हणाले, 'प्रत्येक व्यक्तीने आपल्या उत्पन्नातील खारीचा वाटा कोल्हापूर व सांगली येथील पूरग्रस्तांसाठी द्यायला हवा. सामाजिक संस्थांबरोबरच सर्व स्तरातून पूरग्रस्तांना मदत केली जात आहे. प्रत्येकजण आपापल्या पद्धतीने मदत करण्याचा प्रयत्न करीत आहे. ही सामाजिक भावना अशीच कायम राहिली आहे. समाजात सामाजिक भावना राहिल्यास अनेक प्रश्न सुटण्यास मदत होईल. पोलिस मुख्यालय येथील पोलीस क्रेडीट सोसायटीने नेहमीच आपल्या कार्यकुशलतेने सामाजिक भावना जपली आहे. त्यांनी पूरग्रस्तांसाठी दिलेली मदत प्रेरणादायी आहे.'