म. टा. प्रतिनिधी, नगर
नगर-जामखेड रोडवर मोटारसायकलवरून घरी जात असलेल्या एकाला सात जणांनी अडवून मारहाण करून लुटले. या प्रकरणी भिंगार कॅम्प पोलिस स्टेशनला अज्ञात पाच जणांविरुद्ध दरोड्याचा गुन्हा नोंदविला आहे. कंपनीत सुपरवायझर म्हणून नोकरीत असलेल्या चंद्रकांत सुभाष बोरुडे (रा. सारोळा बद्धी, ता. नगर) याला लुटण्यात आले. बोरुडे हे रात्रीच्या वेळी नगरकडून जामखेड रोडने त्यांच्या घरी जात होते. हात्तीबारवजवळून जात असताना बोरुडे यांना मोटारसायकलवरून आलेल्या चोरट्यांनी अडविले. लाथाबुक्कांनी मारहाण करून खिशातील १६ हजार रुपयांची रोख रक्कम हिसकावून घेतली. चोरी करून चोरटे हे नगरकडे मोटारसायकलवर निघून गेले. या मारहाणीत बोरुडे हे जखमी झाले. ही माहिती मिळाल्यानंतर शहराचे पोलिस उपअधीक्षक संदीप मिटके, सहायक पोलिस निरीक्षक संदीप पाटील, पोलिस उपनिरीक्षक गजानन करेवाड यांनी घटनास्थळी जाऊन पाहणी करून लुटणाऱ्या टोळीचा शोध सुरू केला आहे.
माणिक चौकात दुकान फोडले
नगर शहरातील माणिक चौक येथे रात्रीच्या वेळी चोरट्यांनी दुकान फोडून पाइप व इतर साहित्य चोरून नेले. चोरी करताना चोरटे सीसीटीव्ही कॅमेऱ्यामध्ये कैद झाले आहेत. याप्रकरणी पाच ते सहा चोरट्यांविरूद्ध कोतवाली पोलिस स्टेशनला गुन्हा नोंदविण्यात आला आहे. माणिक चौक येथे नगरकर यांच्य़ा मालकीचा गाळा आहे. या गाळा देवांग पारेख यांनी भाडोत्री घेतलेला आहे. चोरट्यांनी गाळ्याचे कुलूप तोडून विक्रीसाठी असलेले लहान, मोठे पाइप व इतर साहित्य चोरून नेले आहेत.