कांदा क्विंटलमागे साडेतीन हजारावर

म.टा.प्रतिनिधी,नगर

नगर तालुका बाजार समितीत गुरुवारी झालेल्या लिलावात चांगल्या कांद्याला विक्रमी २८०० ते ३५०० रुपये क्विंटल असा भाव मिळाला. उत्तर भारतातील राज्यांमधील कांदा पावसामुळे खराब झाला असल्याने महाराष्ट्रातील कांद्याची मागणी वाढली आहे. परिणामी, कांद्याचे लिलाव तेजीत सुरू झाले आहेत.

नगर तालुका बाजार समितीत दर सोमवारी, गुरुवारी व शनिवारी कांदा लिलाव होतात. आज झालेल्या लिलावात एक नंबरच्या चांगल्या कांद्याला २८०० ते ३५०० रुपये क्विंटल असा भाव मिळाला. दोन नंबरच्या कांद्याला २४०० ते २८०० रुपये क्विंटल तर तीन नंबरच्या गोलटी कांद्याला १८०० ते २४०० रुपये भाव मिळाला. आज नगर बाजार समितीत ३० हजार क्विटल कांदा आवक झाली. जिल्ह्यातील शेवगाव व राहुरी बाजार समितीसह अन्य बाजार समित्यांमध्येही आजच्या लिलावात कांद्याला चांगले भाव मिळाल्याचे सूत्रांनी सांगितले.

महाराष्ट्रातील कांद्याला देशभरातून मागणी वाढल्याने चांगला भाव मिळू लागला आहे. त्यामुळे शेतकऱ्यांनी फसवणूक टाळण्यासाठी कांद्याची शिवारात विक्री करू नये, भाव चांगला असल्याने काहीजणांकडून शिवारात येऊन कांदा खरेदी होऊ शकते. पण यातून आर्थिक फसवणूक होण्याचे प्रकार याआधी घडले असल्याने शेतकऱ्यांनी अशी शिवारात विक्री करण्याऐवजी त्यांना सोयीच्या असलेल्या कोणत्याही बाजार समितीत जाऊन कांदा विकण्याचे आवाहन नगर बाजार समितीचे सचिव अभय भिसे यांनी केले आहे.