कांद्याच्या दरात घसरण सुरुच

म. टा. प्रतिनिधी, नगर

बाजार समितीत लिलावासाठी कांद्याची आवक वाढली आहे. कांद्याच्या दरात मात्र सुरू असलेली घसरण अजूनही थांबलेली नाही. शनिवारी नेप्ती उपबाजार समितीच्या आवारात झालेल्या लिलावात कांद्यास ७०० ते ८०० रुपयांपर्यंत प्रती क्विंटल भाव मिळाले. म्हणजेच, एक किलो कांदा आठ रुपयांना विकला गेला. दरम्यान, भाव कमी मिळत असल्याने शेतकऱ्यांकडून लिलाव बंद पाडून आंदोलने केली जात असली तरी कांद्यास काही समाधानकारक भाव मिळत नाही.

जिल्ह्यातील कांद्यास बाहेरच्या राज्यांतून मागणी कमी झाली आहे. त्याचा परिणाम भावावर झाला आहे. आवक वाढूनही भाव मात्र वाढलेले नाही. मागील आठवड्यात याच पद्धतीने भाव मिळाल्याने शेतकरी संतप्त झाले होते. त्यांनी लिलाव बंद करुन भाव वाढवून देण्याची मागणी करत रास्ता रोको आंदोलन केले. त्यानंतर या शनिवारी तरी चांगले भाव मिळतील असे वाटले होते. परंतु , यावेळीही शेतकऱ्यांना समाधानकारक भाव मिळाले नाहीत. एक क्विंटल कांद्यास ८०० रुपयांपर्यंत भाव मिळाले. सरासरी ६५० रुपये बाजारभाव मिळाले. कांद्यास एवढा कमी भाव मिळाला. यावेळी लिलावासाठी जिल्हाभरातून तब्बल ४६ हजार ९९५ क्विंटल कांद्याची आवक झाली होती.