तूर खरेदीसाठी ऑनलाइन नोंदणी

म. टा. प्रतिनिधी, नगर

केंद्र सरकारच्या किमान आधारभूत किंमत धोरणानुसार जिल्ह्यात सरकारी तूर खरेदी केंद्र सुरू होणार आहेत. या वेळी तूर खरेदीत कोणताही गोंधळ होऊ नये यासाठी अगोदर शेतकऱ्यांची ऑनलाइन नोंदणी केली जाणार आहे. ही खरेदी पणन महासंघाकडून करण्यात येणार आहे.

जिल्ह्यातील श्रीरामपूर, राहाता, अकोले, संगमनेर व कोपरगाव या तालुक्यांसाठी श्रीरामपूर येथील श्रीरामपूर तालुका प्रगत बागायत सहकारी संस्था येथे शेतकऱ्यांची ऑनलाइन नोंदणी केली जाणार आहे. पाथर्डी व राहुरी तालुक्यांसाठी वांबोरी येथील राहुरी तालुका खरेदी विक्री संघ येथे नोंदणी होणार आहे. नेवासे तालुक्यासाठी नेवासा तालुका कृषी उत्पन्न बाजार समिती, जामखेडसाठी कृषी उत्पन्न बाजार समिती व पुण्यश्लोक कृषी प्रक्रिया सहकारी संस्था, कर्जत व श्रीगोंदे तालुक्यांसाठी कर्जत येथील अमरसिंह अॅग्रो प्रोड्युसर कंपनी तसेच नगर तालुक्यासाठी नेप्ती शिवारातील कृषी उत्पन्न बाजार समिती उपआवारात ऑनलाइन नोंदणीची सुविधा उपलब्ध आहे. पारनेर तालुक्यासाठी पारनेर तालुका कृषी उत्पन्न बाजार समितीत ऑनलाइन नोंदणी केली जाणार आहे.

या नोंदणीत शेतकऱ्यांची माहिती व त्यांच्याकडील तुरीची माहिती घेतली जाणार आहे. त्यानंतर त्यांना तूर केव्हा विक्रीसाठी घेऊन यायची, हेही सांगितले जाणार आहे. ऑनलाइन नोंदणी असल्यामुळे मागील वर्षीसारखा गोंधळ होणार नसल्याचे सांगण्यात आले. याबाबत आधिक माहितीसाठी जिल्हा मार्केटिंग कार्यालयाशी संपर्क साधण्याचे आवाहन करण्यात आले आहे.