‘पांगरमल’ तपास पुणे पथकाकडे

म. टा. प्रतिनिधी, नगर
बनावट दारूमुळे पांगरमल येथील नऊजणांचा बळी गेला. याप्रकरणी सीआयडीने तपास करून दोषारोपपत्र दाखल केले असून, उर्वरित तपास सुरूच आहे. आता हा तपास कोल्हापूर येथील सीआयडीकडून पुणे येथील सीआयडीच्या अधिकाऱ्याकडे देण्यात आला असून, या पथकाने तपास सुरू केला आहे.
आता या गुन्ह्याचा तिसरे तपासी अधिकारी तपास करणार आहेत. हा गुन्हा घडल्यानंतर पोलिस उपअधीक्षक आनंद भोयटे हे तपास करत होते. पोलिसांचा तपास संपत आला असतांना ज्येष्ठ समाजसेवक अण्णा हजारे यांनी हा तपास सीआयडीकडे देण्याची मागणी केली होती. त्यानुसार हा तपास सीआयडीकडे वर्ग होऊन सीआयडीचे कोल्हापूरचे अप्पर अधीक्षक गणेश मोरे यांच्याकडे हा तपास देण्यात आला होता. हा तपास सीआयडीकडे उशीरा वर्ग झाल्याने सीआयडीला तपासासाठी कमी वेळ मिळाला होता. पोलिसांनी केलेल्या तपासाचा आधार घेत सीआयडीने आणखी काही तपास पूर्ण करत ११ मे रोजी नगर पंचायत समिती व जिल्हा परिषद सदस्यांसह वीस जणांविरुद्ध दोषारोपपत्र दाखल केले. मृत्यूस कारणीभूत ठरणे, जीविताला अपाय होईल असे घातक रसायन पाजणे, महाराष्ट्र दारूबंदी कायद्याच्या कलमांनुसार आरोपीविंरुद्ध आरोप ठेवण्यात आले आहेत. सीआयडीने सिव्हिलची कॅन्टिन चालविण्यासाठी घेणाऱ्या हॉटेल व्यावसायिक सुरजितसिंग भगतसिंग गंभीर याला आरोपी केले असले तरी या आरोपीला सीआयडी पकडू शकलेली नाही. हा आरोप अद्याप फरार आहे. दोषाररोपपत्र दाखल केल्यानंतर उर्वरित तपास करून पुरवणी दोषारोपपत्र दाखल करण्याचे सीआयडी जाहीर केले होते.
दरम्यान, तपासी अधिकारी गणेश मोरे यांची कोल्हापूर येथून दौंड येथे पोलिस उपअधीक्षक म्हणून बदली झाली. त्यामुळे उर्वरित तपास पुणे येथील सीआयडीच्या पथकाकडे देण्यात आला आहे. पुण्यातील अप्पर अधीक्षक दिलीप नवखूरकर यांच्या पथकाकडे हा तपास देण्यात आला आहे. या प्रकरणी गुन्हा दाखल झाल्यापासून पोलिस उपअधीक्षक भोयटे, सीआयडीचे मोरे यांच्यानंतर नवखूरकर हे तिसरे अधिकारी आहेत. प्रत्येक टप्प्यात वेगवेगळ्या तपासी अधिकाऱ्यांकडून हा तपास होत आहे. पांगरमलप्रकरणी काही पोलिस कर्मचारी व दारू बनविणारे आरोपी हे संपर्कात असल्याचे उघडकीस आले होते. या कर्मचाऱ्यांवर कठोर कारवाई झालेली नाही. काही पोलिस कर्मचाऱ्यांची सीआयडीकडून चौकशी सुरू असल्याची माहिती सीआयडीच्या सूत्रांनी दिली.