पारधी जात पंचायत बदलास झाली राजी

म. टा. वृत्तसेवा, नगर

आदिवासी पारधी समाजातील घातक रुढी, समजुती व अंधश्रद्धा तसेच वाढती व्यसनाधीनता संपुष्टात आणण्यासाठी आणि स्त्री-पुरुष भेदाभेद नष्ट करण्यासाठी समाजाच्या जातपंचायतीचे पंच राजी झाले आहेत. नगर येथे रविवारी झालेल्या पारधी समाजाच्या चर्चासत्रात पंचांनी जात पंचायतीचे पारंपरिक संकेत झुगारून समाजाभिमुख ठराव संमत केले.

आदिवासी पारधी संघटना व क्राय (मुंबई) संस्थेच्या सहकार्याने येथील सीएसआरडी संस्थेत पारधी जातपंचायतीचे चर्चासत्र झाले. यात अमरावती, लातूर, सोलापूर, पुणे व नगर जिल्ह्यातील समाजाचे पंच सहभागी झाले होते. खासदार दिलीप गांधी यांच्या हस्ते चर्चासत्राचे उद्घाटन झाले. यात कुमार निलन्दू, सुनीता भोसले, डॉ. बाळासाहेब बळे, बाळासाहेब सूर्यवंशी, बाबूसिंग पवार, राजेश काळे तसेच आयोजक राजेंद्र काळे सहभागी झाले होते.

या चर्चासत्रात मुले-मुली वा स्त्री-पुरुष भेदभाव न करणे, बालविवाह बंदी, मुलांना भिक्षा मागण्यास बंदी, मुला-मुलींना सक्तीचे शिक्षण, हुंड्यासाठी स्त्रियांची विक्री न करणे, जातीतील पोटभेद संपवणे तसेच समाजात एकत्र खानपान केले तर पंचांनी दंड न करणे असे ठराव पंच बाबूसिंग पवार (अमरावती), राजेश काळे (सोलापूर), सुनीता भोसले(पुणे), रंगीश्या काळे (कर्जत), रतन काळे (नगर), बंकट काळे (श्रीगोंदे), सुधीर चव्हाण यांनी केले. त्याला उपस्थित समाजबांधवांनी मंजुरी दिली.

खासदार गांधी यांनी, 'पारधी समाजातील शिक्षित मुलांनी नोकरीबरोबर वेगवेगळ्या योजनांचा लाभ घेऊन विविध व्यवसाय करावेत', असे आवाहन केले. आरोग्य, शिक्षण, घरकुल अशा जीवनदायी योजनांचा समाजाला लाभ मिळवून देण्याची ग्वाहीही त्यांनी दिली. पोलिस अधीक्षक रंजनकुमार शर्मा यांनी पारधी समाजातील मुलांना पोलिस प्रशिक्षण देण्याचा चांगला निर्णय घेतल्याचे कौतुकही त्यांनी केले.