भाजपविरोधात निलेश लंकेही मैदानात; शेलक्या शब्दांमध्ये केली टीका

अहमदनगर : राज्यात भाजप आणि शिवसेनेचे नेते भ्रष्टाचाराच्या मुद्द्यावरून एकमेकांवर टीकेची झोड उठवत आहे. भाजपचे नेते किरीट सोमय्या आणि शिवसेनेचे खासदार संजय राऊत दररोज पत्रकार परिषद घेऊन एकमेकांच्या विरोधात नवनवीन आरोप करत आहेत. याच वादात आता राष्ट्रवादीचे पारनेरचे आमदार निलेश लंके यांनीही उडी घेत भाजपवर निशाणा साधला आहे. (Nilesh Lanke Latest News Update)

'जसा पाण्याशिवाय मासा तडफडतो, तशी सत्तेविना भाजपची अवस्था झाली आहे. आरोप, प्रत्यारोप, ईडीचा धाक दाखवणे हा केंद्रातील सत्तेचा गैरवापर असून भाजपची वाटचाल चुकीच्या दिशेने सुरू आहे,' असं आमदार लंके यांनी म्हटलं आहे.

घरांवर मोर्चे काढण्याची वेळ भाजपमुळेच; थोरातांकडून काँग्रेसच्या आक्रमक आंदोलनाचे समर्थन

आमदार निलेश लंके हे शिर्डी येथे आले असता राहाता येथील एका कार्यकर्त्याच्या घरी जेवण करण्यासाठी थांबले होते. यावेळी त्यांनी राहाता येथील बाजारपेठेत व्यावसायिकांना भेट दिली. कोविड काळात लंके यांनी केलेल्या कामामुळे अवघ्या महाराष्ट्राला ते परिचित झाले आहेत. त्यांना बघून राहाता येथील व्यावसायिक व तरुणांना त्यांच्यासोबत फोटो आणि सेल्फी घेण्याचा मोह आवरला नाही. लंके यांनी देखील तरुणांना नाराज न करता सर्वांसोबत मनमुराद गप्पा मारल्या. व्यवसायाने टेलर असलेल्या अमोल चौधरी नामक लंके यांच्या एका चाहत्याने तर अवघ्या २० मिनिटात शर्ट शिवून तो लंके यांना भेट दिला. मतदारसंघाच्या बाहेर देखील एवढे प्रेम मिळत असल्याने भारावून गेल्याचं लंके यांनी सांगितलं आहे.

माध्यमांशी संवाद साधताना निलेश लंके म्हणाले की, राजकारणात यश आणि अपयश या दोन गोष्टी असतात. अपयश आल्यानंतर आपण आपल्या चुका शोधायच्या असतात. आपण जनतेची काय सेवा करायला कमी पडलो? त्यापद्धतीने सुधारणा केली पाहिजे. आमचे नेते शरद पवार, उद्धव ठाकरे, बाळासाहेब थोरात यांच्या नेतृत्वात महाविकास आघाडीचे सरकार आले. विरोधकांनी आपल्याला अपयश आले या भावनेने शांत राहिले पाहिजे. मात्र तसं होताना दिसत नाही. जसा पाण्याविना मासा तडफडतो तशी सत्तेविना भाजपची अवस्था झाली असून केंद्रातील सत्तेचा गैरवापर सुरू असल्याचा आरोप लंके यांनी केला आहे.