‘पॉज’ महाकरंडक विजेती

म. टा. प्रतिनिधी, नगर

महावीर प्रतिष्ठान आयोजित ‘अहमदनगर महाकरंडक राज्यस्तरीय’ एकांकिका स्पर्धेत मुंबईच्या संघांनी बाजी मारली. मुंबई येथील कवडसा प्रोडक्शन संस्थेने सादर केलेली ‘पॉज’ एकांकिका सर्वोत्कृष्ट ठरली आहे. त्यांना ७१ हजार १११ रुपये रोख व महाकरंडक देऊन मान्यवरांच्या हस्ते गौरवण्यात आले. तर, मुंबई येथीलच रॉ प्रोडक्शन संस्थेची ‘डॉल्बी की धडधड’ एकांकिका द्वितीय व महर्षी दयानंद कॉलेज मुंबई यांची 'शुभयात्रा' एकांकिकेने तृतीय क्रमांक पटकावला. या दोन्ही संघांना अनुक्रमे ५१ हजार १११ रुपये व ३१ हजार १११ रुपयांचे पारितोषिक व करंडक देण्यात आला आहे. दरम्यान, स्पर्धेमध्ये सर्वांधिक पारितोषिके मिळवत मुंबईच्या संघांनी आपले वर्चस्व कायम ठेवले.

सावेडी उपनगरातील माऊली सभागृहामध्ये ११ ते १४ जानेवारी दरम्यान राज्यस्तरीय एकांकिका स्पर्धेची अंतिम फेरी आयोजित करण्यात आली होती. अंतिम फेरीसाठी पुणे, मुंबई, औरंगाबाद, नाशिक अशा राज्यातील विविध भागातून आलेल्या २९ संघांनी एकांकिका सादर केल्या. स्पर्धेचे पारितोषिक वितरण रविवारी रात्री अभिनेते अंकुश चौधरी यांच्या हस्ते उत्साहात पार पडले. याप्रसंगी अरविंद व्होरा, स्पर्धेचे संयोजक उद्योजक नरेंद्र फिरोदिया, छाया फिरोदिया, आशा फिरोदिया, ललिता फिरोदिया, विक्रम फिरोदिया, गौरव फिरोदिया, रिंकू फिरोदिया, कल्याणी फिरोदिया, मुख्य परीक्षक प्रवीण तरडे, अमित भंडारी, विकास कदम उपस्थित होते.

नाट्यवाडा औरंगाबाद संघाने सादर केलेल्या 'मॅट्रीक' एकांकिकेला चौथे पारितोषिक मिळाले आहे. तर, मुंबई येथील रुईया कॉलेजच्या 'संगीत घागरे के पिछे' एकांकिकेला उत्तेजनार्थ पारितोषिक देऊन गौरवण्यात आले. यंदाची सर्वोत्कृष्ट एकांकिका म्हणून पुणे येथील रंगपंढरी संस्थेने सादर केलेल्या 'श्री व सौ साखरे' एकांकिकेला पारितोषिक मिळाले. त्यांना २१ हजार १११ रुपये व करंडक देण्यात आला. कार्यक्रमाचे प्रास्ताविक स्वप्नील मुनोत यांनी तर सूत्रसंचालन प्रसाद बेडेकर यांनी केले. अॅड. पुष्कर तांबोळी यांनी आभार मानले.

चौकट ः

वैयक्तिक पारितोषिके (एकांकिका)

दिग्दर्शन : प्रथम - तेजस साठे (डॉल्बी वाजलं की), द्वितीय - विनायक चव्हाण (पॉज), तृतीय - ओंकार राऊत (शुभयात्रा), उत्तेजनार्थ - संजय जामखंडी (संगीत घागरे के पिछे), तारा उपाध्याय (श्री व सौ साखरे).

उत्कृष्ट अभिनेता : प्रथम - स्वप्नील हिंगडे (डॉल्बी वाजलं की), द्वितीय - विनायक चव्हाण (पॉज), तृतीय - जगदीश जाधव (मॅट्रिक), उत्तेजनार्थ - प्रतीक वाळके (लालटेन) व हर्षा राऊत (श्री व सौ. साखरे).

उत्कृष्ट अभिनेत्री : प्रथम - काजल कुलकर्णी (पॉज), द्वितीय - पारुल देशपांडे (तळ्यात मळ्यात), तृतीय - अंजली कदम (श्री व सौ. साखरे), उत्तेजनार्थ - प्रणिता साठ्ये (डॉल्बी वाजलं की), शिवानी नाईक (मॅट्रिक).