प्रधान न्यायाधीश श्रीकांत आणेकर यांची मंजुरी
म. टा. प्रतिनिधी, नगर
नवीन जिल्हा न्यायालयातील पार्किंगला शिस्त लावण्यासाठी न्यायालयात वाहन आणणाऱ्यांकडून आता पैसे वसूल केले जाणार आहेत. प्रधान जिल्हा न्यायाधीश श्रीकांत आणेकर यांनी 'पे अॅँड पार्क'ला परवानगी दिली आहे. त्यामुळे येत्या काही दिवसांमध्ये खासगी एजन्सीची नेमणूक करून तेथील पार्किंग व्यवस्था चालविण्यासाठी देण्यात येणार आहे. सध्या दोन वाहतूक पोलिस या ठिकाणची पार्किंगची व्यवस्था पाहतात.
वकिल संघटनेच्या काही मागण्या प्रधान जिल्हा न्यायाधीश आणेकर यांनी पूर्ण केल्या आहेत. त्याचबरोबर जुन्या न्यायालयातील कौटुंबिक न्यायालयातील पक्षकार व वकिलांच्या सोयीसाठी नवीन कँटिनला परवानगी देण्यात आली आहे. लॉयर्स डे निमित्त शहर वकिल संघटनेच्या वतीने जिल्हा न्यायालयात तीस वर्षांहून अधिक काळ वकिल म्हणून काम करणाऱ्या ज्येष्ठ वकिलांचा सत्कार करण्यात आला. त्यावेळी प्रधान जिल्हा न्यायाधीश आणेकर अध्यक्षस्थानी होते. महाराष्ट्र गोवा-बार कौन्सिलचे उपाध्यक्ष अॅड. अमोल सावंत प्रमुख पाहुणे म्हणून उपस्थित होते. या वेळी जिल्हा न्यायाधीश श्रीराम जगताप, विधी सेवा प्राधिकरणाचे सचिव सुनीलजीत पाटील, जिल्हा सरकारी वकिल सतीश पाटील, वकिल संघटनेचे अध्यक्ष अॅड. भुषण बऱ्हाटे, उपाध्यक्ष सुहास टोणे, अमोले धोंडे उपस्थित होते. जिल्हा न्यायालयामध्ये दररोज शेकडो पक्षकार, वकिल येत असतात. त्यामुळे न्यायालयाच्या पार्किंगमध्ये दुचाकी, चारचाकी वाहनांची गर्दी होते. अनेकदा रस्त्यावर वाहने लावण्यात येतात. पार्किंगमधील वाहने व्यवस्थित लावण्यासाठी वाहतूक शाखेच्या दोन कर्मचाऱ्यांची नेमणूक करण्यात आलेली आहे. या कर्मचाऱ्यांकडून अनेकदा बेशिस्त वाहनचालकावर कारवाई करण्यात आलेली आली आहे. आता पे अॅण्ड़ पार्किंगची व्यवस्था करण्यात येणार आहे. त्यासाठी एखादी एजन्सी नेमण्यात येणार आहे.