अज्ञात व्यक्तीविरुद्ध फसवणुकीचा गुन्हा
म. टा. प्रतिनिधी, नगर
महाराष्ट्र बँकेत पाचशे व शंभर रुपयांच्या सहा बनावट नोटांचा भरणा केल्याचा प्रकार उघडकीस आला आहे. याप्रकरणी अज्ञात व्यक्तीविरुद्ध तोफखाना पोलिस स्टेशनला फसवणुकीचा गुन्हा नोंदविण्यात आला आहे. जिल्ह्यातील बँक ऑफ महाराष्ट्राच्या कोणत्यातरी शाखेमध्ये या नोटांचा भरणा झाला असल्याचे फिर्यादीत म्हटले आहे.
नगर शहरामध्ये अनेक वेळा बनावट नोटा पकडण्यात आल्या आहेत. आता तर बनावट नोटांचा बँकांमध्ये भरणा केला जात असल्याचा प्रकार उघडकीस आला आहे. याप्रकरणी महाराष्ट्र बँकेच्या प्रियांका मदनमोहन दुआ यांनी गुरुवारी रात्री फिर्याद दिली आहे. दुआ या बँकेच्या चितळे रोड शाखेत नोकरीला आहेत. भरणा केलेल्या काही नोटांतील पाचशे रुपयांची एक, शंभर रुपयांच्या पाच अशा सहा नोटांबाबत शंका आली. या नोटा तपासल्यानंतर त्या बनावट असल्याचे निदर्शनात आले. बनावट नोटा पोलिस स्टेशनला देऊन याप्रकरणी गुन्हा नोंदविण्यात आला आहे. नगर जिल्ह्यातील बँक ऑफ महाराष्ट्राचे कोणत्यातरी शाखेमध्ये बनावट नोटा असल्याचे माहित असून, त्या बँकेत भरणा करून बँकेची फसवणूक केली, असे फिर्यादीत म्हटले आहे. तोफखाना पोलिस स्टेशनचे पोलिस उपनिरीक्षक एस. एम. सोनवणे हे तपास करीत आहेत.