प्रलंबित पगार, मेडिकल बिले मंजूर करा
पदवीधर शिक्षक महासंघाची मागणी; उपशिक्षणाधिकाऱ्यांना निवेदन
म. टा. प्रतिनिधी, नगर
शिक्षकांचे प्रलंबित मेडिकल बिल, आंतरजिल्हा बदलीने आलेल्या शिक्षकांचे प्रलंबित वेतन, तसेच त्यांचे भविष्य निर्वाह निधीचे खाते तत्काळ उघडावे, अशी मागणी पदवीधर प्राथमिक शिक्षक महासंघाने केली आहे. याबाबत संघटनेच्या पदाधिकाऱ्यांनी उपशिक्षणाधिकारी अंकुश जंजीरे व लेखाधिकारी बनसुडे यांना निवेदन दिले.
प्राथमिक शिक्षकांनी जिल्हा परिषदेकडे सादर केलेली मेडिकल बिले अनेक दिवसांपासून प्रलंबित आहेत. त्रुटींची पूर्तता करूनदेखील बिले प्रलंबित आहेत. मेडिकल बिल दाखल केल्यानंतर मंजूर होण्यासाठी ठराविक कालावधी निश्चित करण्यात यावा, मेडिकल बिलांची यादी जिल्हा परिषदेच्या वेबसाइटवर प्रसिद्ध करावी, प्रस्तावातील त्रुटी कळवताना सर्व त्रुटी एकत्रितपणे कळवाव्यात, सन २०१७ मध्ये आंतरजिल्हा बदली होऊन आलेल्या शिक्षकांचे प्रलंबित वेतन अद्याप मिळाले नसल्याने त्यांचे आर्थिक नुकसान होत आहे. त्यामुळे वेतन तत्काळ मिळावे, तसेच शिक्षकांचे भविष्य निर्वाह निधी खाते तत्काळ उघडावे, अशी मागणी पदाधिकाऱ्यांनी केली. यावर एक लाखापर्यंतचे मेडिकल बिल पंचायत समिती स्तरावर देण्याचे अधिकार देण्यात आल्याचे उपशिक्षणाधिकारी जंजीरे यांनी सांगितले. शिक्षकांचे भविष्य निर्वाह निधीचे प्रलंबित खाते तातडीने उघडण्याचे आश्वासन लेखा अधिकारी बनसुडे यांनी दिले. या वेळी राज्य सरचिटणीस महेश डोईफोडे, संघटनेचे जिल्हाध्यक्ष अविनाश गांगर्डे, सतीश राठोड, संतोष झिरपे, संतोष शिंदे, दगडू महांडुळे, गोविंद जाधव, लहू भांबरे, प्रकाश कार्ले, नवीन वागजकर, तुषार दळवी, बाळासाहेब दातीर, संदिप हिरवे, सचिन विधाते, संजय रामफळे आदी उपस्थित होते.
................