शहरबस बंद असल्याने दुसऱ्या दिवशीही नगरकरांचे हाल

म. टा. प्रतिनिधी, नगर

शहर बससेवा सोमवारपासून बंद करण्यात आल्याने त्याचा फटका नागरिकांना दुसऱ्या दिवशीही बसला आहे. बससेवा बंद असल्याचा फायदा घेत पॅगो चालकांनी आपल्या भाड्यामध्ये पाच ते दहा रुपयांनी वाढ केली होती. त्यामुळे मंगळवारी जादा पैसे मोजून धोकादायक पद्धतीने नागरिकांना प्रवास करावा लागला.

शहरामध्ये यशवंत ऑटो कंपनीच्या वतीने शहरबस चालवण्यात येते. या कंपनीला प्रत्येक महिन्याला नुकसान भरपाईपोटी महापालिकेकडून पाच लाख रुपये अनुदान देण्यात येते. परंतु मागील १६ महिन्यांपासून संबंधित कंपनीला हे अनुदान न मिळाल्याने त्यांनी सोमवारपासून बससेवा बंद केली आहे. त्यानंतर महापालिका प्रशासन व बससेवा चालवणारी कंपनी यांच्यामध्ये बस सुरू करण्याबाबत सोमवारी चर्चा झाली होती. परंतु, त्यामध्ये तोडगा न निघाल्याने अखेर मंगळवारीसुद्धा शहरबस बंद ठेवण्याचा निर्णय कंपनीने घेतला होता. त्यानुसार मंगळवारी एकही शहरबस रस्त्यावर धावली नाही. त्याचा फटका सामान्य नागरिकांना बसला. शहरबस बंद असल्याचा फायदा घेऊन पॅगो चालकांनी आपल्या दरामध्ये पाच ते दहा रुपयांनी वाढ केली होती. तसेच प्रवासी क्षमतेपेक्षा गाडीमध्ये जादा प्रवाशांना बसवण्यात येत होते. त्यामुळे प्रवाशांचे जादा पैसे मोजूनसुद्धा हाल झाले. विळदघाट परिसरातील महाविद्यालयांमध्ये जाणारे विद्यार्थी, एमआयडीसी परिसरातील कंपनीचे कामगार यांना तर दिल्लीगेट परिसरातून विळदघाटपर्यंत जाण्यासाठी पंचवीस ते तीस रुपये मोजावे लागले. दरम्यान, मंगळवारी महापालिका प्रशासन व बससेवा चालवणारी कंपनी यांच्यामधील चर्चा यशस्वी झाली असून बुधवारी शहरबस सुरू होणार आहे. त्यामुळे नागरिकांना दिलासा मिळाला आहे.