पावसामुळे बायपास रस्त्याची चाळण

म. टा. प्रतिनिधी, नगर
नगर शहर बायपास रस्त्यात सगळीकडे खड्डे पडले असून हा रस्ता खड्ड्यांचा रस्ता म्हणून ओळखला जाऊ लागला आहे. रस्त्याची अशी दुर्दशा झाली असताना दुरुस्तीसाठी काहीच हालचाली होत नाहीत तर दुसरीकडे अवजड वाहने या रस्त्याने जाण्याचे टाळून शहरात प्रवेश करत आहेत. अवजड वाहनांच्या प्रवेशाने शहरातील वाहतूक विस्कळीत झाली असून वाहतूक कोंडी आणि अपघातांचे प्रमाणही वाढले आहे. या रस्त्याच्या दुरुस्तीसाठी सार्वजनिक बांधकाम विभागाने टेंडर प्रसिद्ध झाले असले तरी राज्यभरातील ठेकेदारांचे सध्या बहिष्कार आंदोलन सुरू असल्याने पुढील कार्यवाही झालेली नाही.
बायपास रस्त्यास गेल्या वर्षभरापासून खड्डे पडले आहेत. काही ठिकाणी तर रस्ता पुर्णपणे उखडला आहे. या रस्त्यावर आता केवळ माती आणि खड्डेच शिल्लक राहिले आहेत. गेल्या वर्षीच्या पावसाळ्यापासून ही परिस्थिती कायम असून यावर्षीचा पावसाळा संपत आला तरी देखील रस्त्याची दुर्दशा संपलेली नाही. या रस्त्याच्या दुरुस्तीसाठी १७ कोटी ७२ लाखांचा निधी मंजूर झाला आहे. सार्वजनिक बांधकाम विभागाने दुरुस्ती कामाचे टेंडरही प्रसिद्ध केले आहे. परंतु, पुढील कार्यवाही मात्र झालेली नाही. त्यामुळे पावसाळ्यापुर्वी दुरुस्तीचे काम सुरू करण्याचे विभागाचे नियोजन फसले आहे. पहिल्या टप्प्यात विळद घाट पायथा ते वाळूंजपर्यंत खड्डे बुजवले जाणार आहेत. या कामासाठी १ कोटी १८ लाख रुपये खर्च केले जाणार आहेत. पावसाळ्यापूर्वी काम सुरू करणार असल्याचे सांगितले गेले होते. प्रत्यक्षात मात्र अजूनही सुरुवात झालेली नाही. जीएसटीतील तरतुदी व अन्य प्रलंबित मागण्यांसाठी राज्यभरातील ठेकेदारांनी कामावर बहिष्कार टाकला आहे. बायपासच्या दुरुस्तीच्या कामासाठी काही ठेकेदारांनी बांधकाम विभागाशी संपर्कही केला आहे. असे असले तरी बहिष्कार आंदोलन संपल्याशिवाय पुढील कार्यवाही होण्याची शक्यता नसल्याचे बोलले जात आहे.