आणखी एकाचा मृत्यू

म. टा. प्रतिनिधी, नगर

विषारी दारूसेवन केल्याने उपचारादरम्यान आणखी एकाचा मृत्यू झाला असून, आतापर्यंत पांगरमल येथील आठ जणांचा बळी गेला आहे. या प्रकरणात अटक केलेल्या चार आरोपींना रविवारी न्यायालयात हजर करण्यात आले असून, त्यांना चार दिवसांची पोलिस कोठडी देण्यात आली आहे.

विषारी दारूसेवन केल्याने पांगरमल येथील सात जणांचा मृत्यू झाला आहे. तर, शनिवारी रात्री खासगी हॉस्पिटलमध्ये उपचार घेत असलेल्या उद्धव मुरलीधर आव्हाड (वय ३२, आव्हाडवाडी, मजले चिंचोली) याचा मृत्यू झाला. आव्हाड पांगरमलच्या शेजारीच असलेल्या आव्हाडवाडी येथून उमेदवाराच्या घरी पार्टीला आला होता. तेथेच त्याने मद्यसेवन केले होते, अशी माहिती पोलिसांनी दिली आहे. पांगरमल येथील दहा जणांवर विविध रुग्णालयांत उपचार सुरू आहेत. विषारी दारूकांडप्रकरणी शनिवारी आरोपी मोहन श्रीराम दुग्गल, त्याचा मुलगा संदीप मोहन दुग्गल व वैभव जयसिंग जाधव (वय ३०, पाइपलाइन रोड) याला नांदेड येथून पोलिसांनी अटक केली होती. तर, शनिवारी रात्री सिव्हिल हडको येथून भरत रमेश जोशी याला अटक करण्यात आली आहे. या चार आरोपींना रविवारी सुट्टीच्या न्यायालयात हजर केले असता चार दिवसांची २२ फेब्रुवारीपर्यंत पोलिस कोठडी देण्यात आली आहे. यापूर्वी चार आरोपींना अटक केलेली आहे.

गुन्हा दाखल असलेला भीमराज आव्हाड याचा भाऊ रावसाहेब आव्हाड याला हॉस्पिटलमधून सोडण्यात आले असून, त्यालाही पोलिसांनी चौकशीसाठी ताब्यात घेतले आहे. या आरोपीकडून ही बनावट दारू तयार कुठे केली, किती प्रमाणात होती, कुठे विकली याबाबत पोलिस तपास करत आहे. जेऊर गटाचे उमेदवार भाग्यश्री मोकाटे, गणाचे उमेदवार मंगला आव्हाड, गोविंद मोकाटे हे आरोपी फरार आहेत.