तरुणीचे कॉल डिटेल्स परस्पर काढले

नगर:तरुणीचे मोबाइल कॉल डिटेल्स परस्पर काढल्याचा प्रकार घडला असून, याप्रकरणी तोफखाना पोलिस स्टेशन व मोबाइल सेलचा एक कर्मचारी अशा दोघा कर्मचाऱ्यांना दोषी ठरवून पोलिस अधीक्षक रंजनकुमार शर्मा यांनी निलंबित केले आहे. याबाबत तरुणीने पोलिस अधीक्षकांकडे तक्रार केली होती.

तोफखाना पोलिस स्टेशनचे पोलिस नाईक दीपक जाधव व मोबाइल सेलमधील प्रमोद जाधव अशी पोलिसांची नावे आहेत. एका पोलिस कर्मचाऱ्याच्या नातेवाइकाशी तक्रार करणाऱ्या मुलीचे प्रेमसंबंध होते. त्यातून तोफखान्याचे कर्मचारी जाधव यांनी मुलीचे कॉल डिटेल्स काढण्य़ासाठी एक अर्ज परस्पर मोबाइल सेलला पाठविला होता. या अर्जाद्वारे मोबाइल सेलमधील कर्मचारी प्रमोद जाधव याने मोबाइल कंपन्याकडून या तरुणीच्या मोबाइलचे कॉल डिटेल्स मागून घेतले होते. परंतु नियमाप्रमाणे गुन्हेगारासंदर्भात या मोबाइल सेलद्वारे कॉल डिटेल्स मागितले जातात. पोलिस अधीक्षकांच्या आदेशानंतर मोबाइल सेलला कॉल डिटेल्स कंपन्यांकडून मागविता येतात.