दिलासा सेलमध्ये सुनेला मारहाण, पोलिस निलंबित

अहमदनगर

महिलांचे कौटुंबीक वाद सोडविण्यासाठी असलेल्या दिलासा सेलकडे तक्रार करणाऱ्या सुनेला व इतरांना दिलासा सेलमध्येच मारहाण करणाऱ्या पोलिस कर्मचाऱ्याला निलंबित करण्यात आले आहे. पोलिस हेडकॉन्स्टेबल दत्तात्रय गोवर्धन बेरड असे निलंबित केलेल्या पोलिसाचे नाव असून तो सायबर पोलिस स्टेशनला नेमणुकीला होता. पोलिस अधीक्षक इशू सिंधू यांनी सोमवारी हा आदेश दिला.

बेरड यांच्या सुनेने पती, सासू, सासऱ्याविरुध्द तीन महिन्यापूर्वी दिलासा सेलकडे तक्रार दिली होती. सासरी शारिरिक व मानसिक त्रास देऊन नांदवत नसल्याची तक्रार होती. त्यावरील सुनावणीला सासरकडील कोणीच दिलासा सेलमध्ये तारखेला हजर राहत नव्हते. पोलिसांनी समज देऊनही हजर राहत नव्हते. शेवटी नोटीस दिल्यानंतर ९ एप्रिल रोजी सासरकडील सर्वजण तारखेला दिलासा सेलमध्ये हजर राहिले. तक्रारदार महिला यांचे तिचे पती यांच्या समुपदेशन करण्यात येत होते. त्याचवेळी पोलिस कर्मचारी बरेड यांनी दिलासा सेलमधील खुर्ची उचलून सुनेच्या डोक्यात मारली. त्यामुळे दिलासा सेलमध्ये गोंधळ होऊन नातेवाइकांमध्ये शिविगाळ व मारहाण झाली. आरडा-ओरडा एकूण दिलासा सेलमधील पोलिस कर्मचारी मध्यस्थीसाठी आले होते. त्यावेळी पोलिस कर्मचाऱ्यांना दमदाटी व धक्काबुक्की केली. मारहाणीमुळे मुलीचे एक नातेवाइक बेशुध्द पडला. त्याला सिव्हिल हॉस्पिटलमध्ये उपचारासाठी दाखल करण्यात आले होते. दिलासा सेलमध्ये झालेल्या घटनेची माहिती पोलिस अधीक्षकांना देण्यात आली. या पोलिस कर्मचाऱ्याची अधिकाऱ्यामार्फत चौकशी झाली. त्यात पोलिस कर्मचारी दोषी आढळून आल्याने पोलिस अधीक्षक इशू सिंधू यांनी पोलिस कर्मचाऱ्याला पोलिस सेवेतून निलंबित केले.