म. टा. प्रतिनिधी, नगर
श्रीगोंदा पोलिसांनी एका महिलेसह १९ मंजुरांची सुटका केली. या परप्रांतीय मजुरांना कोणी बेठबिगार केले याची माहिती पोलिसांनी दिली नाही. तिघे जण महाराष्ट्रातील असून, उर्वरित सर्व जण परराज्यातील असल्याने त्यांची भाषा पोलिसांना समजत नसल्याने या प्रकरणी तपासात अडचणी येत आहेत. तर या पाठीमागे मोठे रॅकेट असल्याचा संशय पोलिसांना आहे.
श्रीगोंदा तालुक्यातील बाबुर्डी, लोणी व्यंकनाथ शिवारात परराज्यातील व्यक्तीला डांबून ठेवल्याची माहिती पोलिसांना मिळाली होती. त्यानुसार बुधवारी पोलिस पथकाने या दोन्ही गावातील शिवारात जाऊन १९ जणांची सुटका केली. तिघे वगळता इतरांना मराठी, हिंदी भाषा येत नसल्यामुळे त्यांच्याबद्दल अधिक माहिती मिळत नाहीत. हे परप्रांतीय मजूर अपंग, मतीमंद असून, त्याना पळवून आणून शेतामध्ये वेठबिगारी करायला लावणे, भीक मागण्यास सांगण्यात येत होते. या मंजुरांना मारहाण करणे, उपाशी ठेवले जात होते.
या सर्वांना तूर्तस श्रीगोंदा पोलिस स्टेशनला ठेवण्यात आले असून, पोलिसांनी त्यांना जेवणही दिले. या लोकांना नेमके कोणी आणले याचा शोध पोलिस घेत आहेत. या मागे मोठे रॅकेट असल्याचा संशय पोलिसांना आहे. या बाबत गुन्हे दाखल करण्याचे काम गुरुवारी रात्री उशीरापर्यंत सुरू होते.