तलावाची रखडली मोजणी

म. टा. प्रतिनिधी, नगर
मनपाच्या नावावर झालेल्या पिंपळगाव माळवी व जेऊर परिसरातील ७०० एकर जागेवर मनपातील सत्ताधारी शिवसेनेला मनोरंजन हब उभे करायचे असले तरी अद्याप या जागेची मोजणीच भूमि अभिलेख विभागाकडून झालेली नाही. त्यामुळे खुद्द महापौर सुरेखा कदम व विरोधी पक्ष नेते बाळासाहेब बोराटे यांनीच यासाठी पुढाकार घेतला असून, भूमि अभिलेख विभागाचे जिल्हा अधीक्षक महेश शिंदे यांची भेट घेऊन ही मोजणी मार्गी लावण्याचे साकडे त्यांना घातले आहे. याशिवाय मनपाच्या मालकीच्या अन्य काही जागांबाबतच्या वादावरही तातडीने निर्णय देण्याची विनंती केली आहे.
पिंपळगाव माळवी व जेऊर येथे तलाव व अन्य मिळून तब्बल ७०० एकर जागा नुकतीच महापालिकेच्या नावावर झाली आहे. नगरचा पर्यटन विकास व्हावा यासाठी या जागेवर हैदराबादच्या रामोजी फिल्मीसिटीच्या धर्तीवर विशेष प्रकल्प राबविण्याचे सत्ताधारी शिवसेनेचे स्वप्न आहे. येथे मनोरंजनासाठी वॉटर पार्क, उद्यान व बोटिंगची सुविधा करण्याचे घाटत आहे. त्यामुळे या जागेची मोजणी करून देण्यासाठी भूमि अभिलेख विभागाकडे पैसेही महापालिकेने जमा केले आहेत. मात्र, अद्याप ही मोजणी झाली नसल्याने महापौर कदम यांनी नुकतीच भूमि अभिलेखचे अधीक्षक शिंदे यांची भेट घेतली. यावेळी विरोधी पक्ष नेते बोराटे, नगरसेवक मुदस्सर शेख, नगररचनाकार संतोष धोंगडे, निवृत्त तहसीलदार एस. बी. शिंदे तसेच पठाण व देवरे आदी होते. यासंदर्भात आवश्यक कार्यवाहीची ग्वाही शिंदे यांनी दिली.
माळीवाड्यातील मनपा गॅरेज व त्रिदल इमारतीच्या मालकीबाबत नगर भूमापन अधिकाऱ्यांनी मनपाच्या बाजूने निकाल दिला आहे. त्याविरोधात अहमदनगर एज्युकेशन सोसायटीने भूमि अभिलेख विभागाच्या जिल्हा अधीक्षकांकडे अपिल केले आहे. या प्रकरणाची तातडीने सुनावणी घेऊन निकाल द्यावा तसेच माळीवाड्यातीलच बेग पटांगणाच्या मालकीबाबत काहींनी हरकती घेतल्याने त्याबाबत मनपाही अपिल करणार असल्याचेही यावेळी स्पष्ट करण्यात आले. सावेडीच्या पाईपलाईन रोडवरील भिस्तबाग चौक ते भिस्तबाग महालादरम्यानच्या रस्त्याची मोजणी करून त्याची हद्द ठरवून देण्याची मागणीही यावेळी करण्यात आली. तसेच सावेडी व मुकुंदनगर भागाचा सिटी सर्व्हेमध्ये समावेश केला जावा आणि मनपाचे रस्ते व खुल्या जागांची नोंद करण्याचीही मागणी केली गेली.