'स्नेहालय'मध्ये २९ ला दिवाळी मेळावा
म. टा. प्रतिनिधी, नगर
उत्कृष्ट व्यवस्थापनासाठी जगभरात प्रसिद्ध असलेल्या 'मुंबईतील डबेवाले'चे पाच-सहा प्रतिनिधी नगरच्या 'स्नेहालय'मध्ये होणाऱ्या दिवाळी मेळाव्यात सहभागी होणार आहेत. येत्या २९ रोजी होणाऱ्या या मेळाव्यासाठी लायन्स क्लबने पुढाकार घेतला असून, शहरातील विविध स्वयंसेवी संस्थांतील गरीब व अनाथ मुलांसाठी हा दिवाळी आनंदोत्सव या दिवशी होणार आहे.
लायन्स क्लब ऑफ अहमदनगरच्या वतीने मागील दहा वर्षांपासून 'स्नेहालय'मध्ये दिवाळी मेळावा होतो. यंदा अकराव्या वर्षी शहरातील विविध स्वयंसेवी संस्थांच्या सुमारे बाराशेवर अनाथ, अपंग, वंचित, निराधार मुला-मुलींसाठी २९ ऑक्टोबरला भाऊबीजेच्या दिवशी मेळावा होणार आहे. यामध्ये 'मुंबईचे डबेवाले' मॅनेजमेंट गुरु सुभाष तळेकर यांच्यासह पाच डबेवाले सहभागी होणार आहेत. नगरमधील युवा गायिका अंजली गायकवाड हिच्या गाण्यांची मैफलही या वेळी होणार आहे. यानिमित्ताने मेळाव्यात सहभागी मुला-मुलींसाठी 'आपण कसे घडावे' या विषयावर तज्ज्ञांद्वारे मार्गदर्शन करण्यात येणार आहे.
'लायन्स'चे माजी प्रांतपाल राज मुछाल, विभागीय अध्यक्ष हरजितसिंग वधवा, झोन अध्यक्ष दिलीप कुलकर्णी व अन्य पदाधिकारी या मेळाव्यात सहभागी होणार आहेत. लायन्स क्लबचे अध्यक्ष आनंद बोरा यांच्यासह अन्य पदाधिकाऱ्यांनी नियोजन केले आहे. २९ रोजी दुपारी ३ वाजता मेळाव्यास सुरुवात होणार असून, मुलांना विविध खेळ, स्पर्धा, नृत्य, संगीताची धमाल, गिफ्ट, आतषबाजी, खाण्यासाठी विविध पदार्थ व भोजनाची मेजवानी मिळणार आहे. सायंकाळी मुलांसह दीपोत्सव करून परिसर पणत्यांच्या प्रकाशाने झगमगणार आहे. डॉ. दीपक, डॉ. किरण, शरद मुनोत, मोहन लुल्ला, बाल कल्याण समिती अहमदनगर, इनरव्हील क्लब ऑफ अहमदनगर व्हिनस आणि निरंजन सेवाभावी संस्थेने या मेळाव्यासाठी सहकार्य केले. सचिव सुमित लोढा तसेच सतीश बजाज, बाल कल्याण समितीचे अध्यक्ष हनीफ शेख, निरंजन सेवाभावी संस्थेचे अतुल डागा, प्राजक्ता डागा, प्रकल्प प्रमुख अरविंद पारगावकर, शांता ठुबे, सुनील छाजेड, धनंजय भंडारे आदी मेळाव्यासाठी परिश्रम घेत आहेत. 'मुंबईचे डबेवाले'चे मॅनेजमेंट गुरू तळेकर हे लंडन येथे प्रिन्स चार्ल्स यांच्या लग्नाला गेले होते. त्या लंडन दौऱ्याचे अनुभव व विनोदी प्रसंग ते 'स्नेहालय'मधील दिवाळी मेळाव्यात मांडणार आहेत.