मुलींशी अश्लील चाळे; शिक्षकावर गुन्हा दाखल

म. टा. वृत्तसेवा, अकोले/नगर

महाराष्ट्र टाइम्स.कॉम

अकोले तालुक्यातील वाघापूर परिसरातील गंभीरवाडी येथील जिल्हा परिषद प्राथमिक शाळेतील शिक्षकाने शाळकरी विद्यार्थिनींशी अश्लील चाळे केल्याची घटना गुरुवारी सकाळी उघडकीस आली. दत्तू पांडुरंग पिचड (वय ४०) असे नराधम शिक्षकाचे नाव आहे. ही माहिती पालकांना मिळाल्यानंतर त्यांनी शिक्षकाला जाब विचारून चोप दिला. याप्रकरणी अकोले पोलिस ठाण्यात पालकांनी दत्तू पिचड याच्याविरुद्ध गुन्हा दाखल केला आहे.
वाघापूरमधील गंभीरवाडीतील जिल्हा प्राथमिक शाळेतील शिक्षक शाळेतील मुलींशी अश्लील वर्तन करून त्यांच्यावर अत्याचार करण्याचा प्रयत्न करत होता. हा प्रकार मुलींच्या पालकांना समजला. त्यानंतर ग्रामस्थ गुरुवारी एकत्र येऊन शाळेत आले. त्यांनी संबंधित शिक्षकाला याबाबत विचारणा केली. त्या वेळी संतप्त झालेल्या काही महिलांनी संबंधित शिक्षकाला चप्पलने चोप दिला. या शिक्षकाने शाळेतील तिसरीतील दोन आणि पाचवीच्या चार अशा सहा मुलींशी गैरवर्तन केल्याचे समोर आले आहे.

याप्रकरणी अकोले पोलिस ठाण्यात बालकांचे लैंगिक अपराधापासून संरक्षण अधिनियम २०१२ प्रमाणे शिक्षकावर गुन्हा दाखल करण्यात आला आहे. आरोपी शिक्षकास अटक करण्यात आली असून पुढील तपास पोलिस निरीक्षक अरविंद जोंधळे यांच्या मार्गदर्शनाखाली पोलिस उपनिरीक्षक दीपक ढोमने करीत आहेत.

दरम्यान, घटनेनंतर संतप्त ग्रामस्थांनी शाळेला टाळे ठोकले. याप्रकरणी प्रभारी गटशिक्षणाधिकारी अरविंद कुमावत यांनी तातडीने संबंधित अहवाल जिल्हा परिषदेचे मुख्य अधिकारी तसेच शिक्षण अधिकारी रमाकांत काटमोरे यांच्याकडे पाठवण्यात येणार असल्याचे सांगितले.