नगरमध्ये न्यू टिळक रोडवरील हुक्का पार्लरवर कारवाई; आठ विद्यार्थ्यांना पकडले
म. टा. प्रतिनिधी, नगर
नगरमधील न्यू टिळक रोडजवळ कुंदा अपार्टमेंटच्या बेसमेंटला सुरू असलेल्या स्मोकी व्हिल्ला हुक्का पार्लरवर पोलिसांनी कारवाई केली. रंगीबेरंगी भिंती, लाइटिंग लावून हुक्का पार्लर तयार करण्यात आला होता. पार्लरमध्ये आठ अल्पवयीन विद्यार्थी आढळून आले. याप्रकरणी हुक्का पार्लर चालकाविरुद्ध कोतवाली पोलिस स्टेशनला गुन्हा नोंदविण्यात आला आहे. सोमवारी रात्री दहाच्या सुमारास ही कारवाई करण्यात आली.
गेल्या वर्षी २००३ च्या सिगारेट व अन्य तंबाखूजन्य पदार्थ (प्रतिबंध) कायदा (कोटपा) या कायद्यात राज्य़ सरकारने बदल केला. कोटपा कायद्यातील दुरुस्तीनुसार राज्यातील कोणत्याही भागात हुक्का पार्लर चालविणे, सुरू करणे किंवा उपहारगृहात हुक्का पार्लर चावणे यावर बंदी घालण्यात आली आहे. त्यानंतर राज्यातील वेगवेगळ्या भागांत बेकायदा हुक्का पार्लर सुरू आहेत. नगरमध्ये वर्दळीच्या भागात बेकायदा हुक्का पार्लर सुरू असल्याचे उघडकीस आले आहे. शहरातील न्यू टिळक रोडजवळील कुंदा अपार्टमेंटच्या बेसमेंटला एक स्मोकिंग सेंटर आहे. त्या ठिकाणी हुक्का पार्लर सुरू असल्याची गुप्त माहिती शहराचे पोलिस उपअधीक्षक संदीप मिटके यांना मिळाली होती. त्यानुसार मिटके, कोतवालीचे पोलिस निरीक्षक विकास वाघ यांच्यासह कर्मचाऱ्यांनी हुक्का पार्लरवर छापा टाकला. त्या वेळी हुक्का पार्लरमध्ये आठ जण आढळून आले असून, सर्व जण विद्यार्थी असून, १८ वर्षांपेक्षा कमी वयाचे आहेत. यातील काही जण पुण्यात शिक्षण घेत आहेत. सुट्टीवर घरी आल्यानंतर काही मित्र एकत्र येऊन या हुक्का पार्लरमध्ये गेले होते. पकडण्यात आलेल्या विद्यार्थ्यांना पोलिस स्टेशनला आणून पालकांना बोलवून त्यांच्या ताब्यात देण्यात आले आहे. हुक्का पार्लरमध्ये दोन हॉल होते. रंगीबेरंगी भिंती, वेगवेगळ्या कलरची लाइटिंग करण्यात आली होती. बंदीपूर्वी पुणे, मुंबईमध्ये या पद्धतीचे पार्लर होते. त्या पद्धतीने हे पार्लर तयार करण्यात आले होते, अशी माहिती पोलिसांकडून मिळाली. माळीवाडा भागातील गोंधळे गल्ली येथील दिनेश दत्तात्रय खरपुडे हा हुक्का पार्लर चालवित होता. त्याला पोलिसांनी ताब्यात घेऊन त्याच्याविरुद्ध गुन्हा नोंदविला आहे. हुक्का पार्लरमधून हुक्का ओढण्याकरिता वापरात येणारे सहा पॉट, वेगवेगळ्या कंपनीचे फ्लेवरचे आठ डब्बे पोलिसांनी जप्त केले आहेत.
तासभरासाठी अडीचशे रुपये
हा हुक्का पार्लर गेल्या महिन्यात खरपुडे याने सुरू केला होता. हुक्का ओढण्यासाठी येणाऱ्या एका व्यक्तीकडून तासाभरासाठी अडीचशे रुपये घेण्यात येत होते. अल्पवयीन मुले, तरुण या हुक्का पार्लरमध्ये येत होते. परंतु, या ठिकाणी हुक्का पार्लर सुरू असल्याची माहिती मिळाल्यानंतर पोलिसांनी कारवाई केली. या पद्धतीचे नगरमध्ये आणखी हुक्का पार्लर सुरू असल्याचा संशय पोलिसांना आहे. सोमवारी रात्री आणखी एका ठिकाणी पोलिस कारवाईसाठी गेले होते. परंतु, ते ठिकाण बंद होते.
कोट :
एका बेसमेंटमध्ये हे हुक्का पार्लर सुरू होते. त्या ठिकाणी कारवाई केल्यानंतर त्य़ात हुक्का ओढळण्यासाठी अल्पवयीन विद्यार्थी आल्याचे विद्यार्थी आढळून आले. त्यांच्याविरुद्ध कारवाई करून विद्यार्थ्यांना पालकांच्या ताब्यात देण्यात आले आहे. मूळचे नगरचे असलेले परंतु, शिक्षणासाठी पुण्यात गेलेले काही विद्यार्थी यात आढळून आले आहेत.
- संदीप मिटके, पोलिस उपअधीक्षक, नगर