प्रकाश कांकरियांची फसवणुकीची तक्रार

म. टा. प्रतिनिधी, नगर
भिंगार कॅन्टोन्मेंट हद्दीतील भूखंडावरील आरटीओचे आरक्षण उठविण्यासाठी एकाने येथील डॉक्टर प्रकाश कांकरिया यांची ७५ लाख रुपयांची फसवणूक केली आहे. कांकरिया यांच्या फिर्यादीवरून मुंबई येथील पवन चंदूलाल खेमाणी व चंदूलाल खेमाणी यांच्याविरुध्द गुन्हा दाखल झाला आहे.
गेल्या महिन्यांत पवन खेमाणी यांच्या फिर्यादीवरून याच जमिनीची बनावट कागदपत्रे तयार करून दुसऱ्याला जमिनीची विक्री केल्याप्रकरणी डॉ. प्रकाश कांकरिया, त्यांची पत्नी सुधा कांकरिया व मनपाचे स्थायी समितीचे सभापती यांच्यासह नऊ जणांविरुद्ध फसवणुकीचा गुन्हा दाखल झाला होता. आता कांकरिया यांच्या फिर्यादीवरून खेमाणी यांच्याविरुद्ध कोतवाली पोलिस स्टेशनला गुन्हा दाखल केला आहे. पवन खेमाणी यांनी जमिनीवरील आरटीओचे आरक्षण उठविण्यासाठी ८ नोव्हेंबर २०१६ ते २२ जून २०१७ दरम्यान ७५ लाख रुपये घेतले होते. तसेच बनावट कागदपत्रे तयार करून विश्वासघात केला असे कांकरिया यांनी फिर्यादीत म्हटले आहे.

विनयभंग करणाऱ्यास सक्तमजुरी

बुऱ्हाणनगर येथे महिलेचा घरात विनयभंग करणाऱ्या आरोपी बंडोपंत मौजीराम चन्ने (वय ५९) याला दोन वर्षांची सक्तमजुरी पाच हजार रुपयांचा दंड अशी शिक्षा झाली. दंडातील तीन हजार रुपयांची रक्कम फिर्यादी महिलेला द्यायची आहे. प्रथमवर्ग न्यायदंडाधिकारी टी. एम. देशमुख व नाईक यांनी हा निकाल दिला. सरकार पक्षातर्फे सहा साक्षीदार तपासण्यात आले असून, विशेष सहायक सरकारी अभियोक्ता एन. आर. वाघ यांनी सरकार पक्षातर्फे काम पाहिले.