दिवाळीत दुचाकी, दागिने खरेदीला प्राधान्य

म. टा. प्रतिनिधी, नगर
दिवाळीच्या खरेदीचा ग्राहकांमध्ये उत्साह असून दुचाकी, सोन्याचे दागिने, चांदी, कपडे, भेटवस्तू अशा विविध वस्तू खरेदी करण्यासाठी ग्राहकांची लगबग सुरू झाली आहे.
ग्राहकांना आकर्षित करण्यासाठी विक्रेत्यांनी सुद्धा आकर्षक योजना जाहीर केल्या आहेत. त्यामुळे पुढील आठ दिवसांमध्ये कोट्यवधी रुपयांची उलाढाल बाजारपेठेत होण्याची शक्यता आहे. दुचाकी वाहनांची खरेदी करणाऱ्यांना विविध ऑफर, दागिन्यांच्या मजुरीवर सूट, खरेदी केल्यानंतर मिळणारे गिफ्ट व्हाउचर...अशा विविध योजना ग्राहकांना आकर्षित करण्यासाठी व्यापाऱ्यांनी जाहीर केल्या आहेत. परंतु मागील आठवड्यात नगर शहरामध्ये पावसाने हजेरी लावल्यामुळे त्याचा परिणाम ग्राहकांच्या संख्येवर झाला होता. रविवारी मात्र पावसाने विश्रांती घेतल्याने नगरच्या बाजारपेठ पुन्हा एकदा ग्राहकांची गर्दी होऊ लागली असून त्यांचा खरेदीला चांगला प्रतिसाद मिळत आहे.

दागिन्यांची खरेदी

सध्या सोन्याचे दागिने घेण्यासाठी ग्राहकांचा प्रतिसाद पाहता दिवाळीच्या काळात सराफ बाजारात मोठी उलाढाल होण्याचा व्यापाऱ्यांचा अंदाज आहे. ग्राहकांना आकर्षित करण्यासाठी विविध योजना सुद्धा विक्रेत्यांनी जाहीर केल्या आहेत. ग्रामीण भागातील ग्राहक मोठ्या प्रमाणात दागिने खरेदीसाठी येत आहेत. याबाबत सराफ व्यापारी अमित कोठारी यांनी सांगितले की, 'सध्या सोन्याचा भाव हा ३० ते ३१ हजार रुपयांच्या दरम्यान आहे. सोने व चांदीचे भाव पुढील आठवडाभर स्थिर राहण्याची शक्यता असल्याने ग्राहकांचा प्रतिसाद दिवाळीच्या काळात अजून वाढू शकतो.'

वाहन खरेदीला पसंती

दिवाळीच्या पार्श्वभूमीवर दुचाकी वाहनांची बुकिंग वाढली आहे. ग्रामीण भागातून खरेदीला चांगला प्रतिसाद मिळत आहे. याबाबत बोलताना दुचाकीचे विक्रेते अभिनंदन भन्साळी यांनी सांगितले की, 'दिवाळीच्या निमित्ताने ग्राहकांना विविध योजना दिल्या आहेत. ग्राहकांची मोपेड, स्कुटी या गाड्यांना जास्त पसंती आहे. दसऱ्याला सुद्धा दुचाकी खरेदीला चांगला प्रतिसाद मिळाला होता. सध्या बुकिंगला मिळणारा प्रतिसाद पाहता दिवाळीच्या काळात खरेदीला चांगला प्रतिसाद मिळेल.'